DILI, 09 Jullu 2025 (TATOLI)-Komisaun Anti Korrupsaun (CAC, sigla portugés) hamutuk ho instituisaun Estadu sira hodi estabelese komisaun orientasaun hodi dezenvolve Estratejia Nasionál Anti Korrupsaun (ENAK) hodi prevene korrupsaun iha instituisaun Estadu sira.
Estabelesimentu Steering Commite hodi dezenvolve ENAK tuir polítika Estadu nian ne’ebé hatuur ona iha lei númeru 7/2020-Medida sira Prevensaun no Kombate Korrupsaun (MPKK), iha artigu 2. Nune’e mós kumpre ba obrigasaun sira Konvensaun Nasoins Unidas nian Kontra Korrupsaun (UNCAC-sigla inglés) iha kapítulu II, artigu 5 nian.
Adjuntu Komisáriu KAK ba asuntu Prevensaun no Sensibilizasaun, Rosario Salsinha Araújo, hatete polítika estabelese ENAK reflete asuntu importante tolu mak hanesan represiva, preventiva no edukasaun anti korrupsaun, nune’e labele mosu atu korrupsaun iha institisaun Estadu sira.
“Estratejia ne’e tenke refleta nafatin asuntu represiva, preventiva no edukasaun anti korrupsaun, nune’e fó valór prinsipál ne’ebé hatuur iha lei medida prevensaun kombate korrupsaun, nune’e prevene korrupsaun iha instituisaun Estadu sira”, dehan nia ba jornalista sira iha salaun Ministériu Solidaridade Sosiál no Inkluzaun (MSSI) Kaikoli, ohin.
Nia dehan estudu balun hatudu Timor-Leste mosu indikasaun ba tentativa korrupsaun husi setór públiku no privadu, tanba ne’e ho estratejia referida bele prevene korrupsaun no reforsa instituisaun Estadu no setór privadu sira.
Iha fatin hanesan, Diretór Ezekutivu Forum Organizasaun Naun Governamentál Timor-Leste (FONGTIL), Valentin da Costa Pinto, hateten ENAK importante atu kontinua prevene prátika ne’ebé nia efeitu negativu ba Timor-Leste nia rekursu sira.
“Esforsu balun ne’ebé Komisaun Anti Korrupsaun halo hamutuk ho entidade hotu-hotu nia hanoin no pasu ne’ebé pozitivu no bele hetan apresiasaun husi entidade hotu-hotu atu bele hamutuk kontra korrupsaun”, nia haktuir.
Notísia relevante: CAC: prevene no kombate korrupsaun presiza asaun koletiva
Jornalista : Natalino Costa
Editora : Rita Almeida
