DILI, 09 Jullu 2025 (TATOLI)—Ministru Asuntu Kombatente Libertasaun Nasionál, Gil da Costa Monteiro “Oan Soru”, orienta ona kompañia sira atu aselera konstrusaun ba jardín eroi iha territóriu laran.
“Ami seidauk bele ko’alia bainhira mak serimónia fúnebre tanba ami seidauk iha orsamentu. Ein-prinsípiu, obra hotu-hotu iha munisípiu sira la’o hotu. Ha’u orienta ona diretór kompañia sira katak tenke finaliza iha tinan-ne’e. Tinan oin-mai tenke prepara ona kampa. Nune’e, ita bele prepara serimónia fúnebre nian,” Ministru Oan-Soru dehan iha nia knaar fatin, Komoro, kuarta ne’e.
Tuir nia katak iha Munisípiu Lautein no Manatutu (Natarbora) obra la’o hela, Lautein mak finalizadu ona. Iha Ainaru hein atu la’o, depoiz iha Ermera la’o tiha ona no nia kampa ne’e hamutuk 500-resin, signifika hela rihun-ida hodibele konkluidu.
Notísia relevante: Tinan ne’e MAKLN kontinua konstrui jardin eroi iha territóriu
Gil esplika projetu konstrusaun kada jardín eroi ne’e kompostu hosi morru protesaun, gapura (portaun), inklui konstrusaun ba kampa (rai-ko’ak) hodi haloot restu mortál.
Entretantu, Ministru Oan-Soru avalia katak empreza kontratór sira barak mak ezekuta serbisu la tuir períodu kontratu no obra balun mós seidauk finalizadu.
“Ha’u ohin husu atu hasoru-malu ho ita-boot sira hotu nune’e bele hatene di’akliu obra sira hotu, liuliu sira-ne’ebé iha relasaun ho jardín eroi iha territóriu, para ita bele kontribui netik buat ruma, molok ita sira-ne’e husik hela rai ida-ne’e ka molok husik hela ita-nia iis ida ikusliu,” nia subliña.
Restu mortál sira-ne’ebé Governu rekolla iha territóriu nasionál dezde tinan 2002 to’o ohin loron, barak mak seidauk haloot ho dignu tanba konstrusaun ba jardín sira seidauk konkluidu. Tuir dadus, Governu foin mak haloot de’it restu mortál 11.116. Ida-ne’e seidauk to’o iha pursentu 25 (25%).
“Hahú husi ministériu to’o ita-boot sira kompañia, ne’e responsábilidade ita-hotu nian. Ministru nia ezijénsia sempre dehan, halo lalais, ita haloot tiha sira, molok ita tuir bá. Maibé, dalaruma ita halo hela, ita bá tiha hotu, sira ita seidauk haloot. Ne’e mak problema,” Ministru esklarese ba kompañia sira.
Entretantu, Sekretáriu Estadu Veteranu, César dos Santos da Silva reforsa tan katak restu mortál ne’ebé seidauk haloot ne’e hamutuk 10.726.
“Ida-ne’e iha territóriu tomák no barak liu iha Ainaru, Likisá no Manatutu,” nia haktuir.
Jornalista : Osória Marques
Editora : Julia Chatarina
