DILI, 09 Jullu 2025 (TATOLI)—Ministra Saúde, Élia dos Reis Amaral, hateten bazeia ho polítika Governu Konstitusionál da-sia (IX) atu harii ospitál andar 10 iha Timor-Leste mak daudaun ne’e Ministériu Saúde hahú prepara dezeñu hafoin ba halo konstrusaun ospitál munisípal no ospitál psikiater rua (2) ho estandar internasionál iha Manufahi no Ermera.
Notísia Relevante:
“Ita prevee ona orsamentu ba kontrasaun ospitál munisípal ne’ebé mak kompostu husi ospitál Munisípal Ermera ida-ne’ebé mak ita dehan katak estandar Internasionál no mós ospitál ba piskiater ne’ebé mak iha Gleno nian. Depois ba fali ospitál Munisípal Same iha Luak ne’ebé mak ita prevee orsamentu fazeadamente,” Élia dos Reis Amaral hateten ba jornalista sira hafoin partisipa reuniaun Konsellu Ministru, iha Palásiu do Governu, ohin.
Nia dehan, orsamentu ne’ebé mak Governu prevee hamutuk millaun $18 ba konstrusaun ospitál sira ho estandar internasionál.
“Iha prosesu nia laran ita-boot sira hatene, katak ita mós agradese tanba komunidade entrega ona rai ne’ebé mak atu halo ba Konstrusaun ospitál rasik. Agora daudaun prosesu dezeñu la’o hela, ita hein katak sei ramata no ita hahú halo kontrusaun,” nia esplika.
Nia informa, ospitál tolu ne’e sei halo kontrusaun dala ida de’it tanba pakote ne’ebé sei dezeña, tanba ospitál rua (2) ne’e entre ida iha Munisípiu Manufahi no ida iha Munisípiu Ermera.
“Hafoin dezeñu, ospitál rua (2) ne’e sei konstrui ida iha Luak, munisípiu Manufahi ni ida seluk harii iha Ermera Dukurai no Gleno. Agora halo hela dezeñu, hafoin ezeñu konklui mak ami sei infoma fila-fali ba ita-boot sira,” nia esplika.
Entretantu, iha 02 Jullu 2025 ne’e, Ministériu Saúde simu onadokumentu rai-nian ne’ebé mak entrega husi komunidade ba Ministériu Saúde, atu halo kontrusaun hospitál Munisípial ho estandar internasionál iha suku Dukurai, postu administrativu Letefoho, munisípiu Ermera.
Jornalista : Felicidade Ximenes
Editór : Cancio Ximenes
