Parlamentu alerta ba falta vasina kontra raiva iha HNGV
DILI, 09 Jullu 2025 (TATOLI) – Prezidente Komisaun F iha Parlamentu Nasionál, ne’ebé trata Asuntu Saúde, Igualdade Jéneru no Inkluzaun Sosiál, Maria Gorumalli Barreto, husu jestór sira iha Ospitál Nasionál Guido Valadares (HNGV, siglá portugés) atu halo jestaun di’ak hodi garante nafatin stock vasina kontra raiva.
“HNGV nia vasina ba moras raiva, liuliu ba ema laiha. Iha Orsamentu Jerál Estadu, iha bens no serbisu, iha rúbrika ida ne’ebé tau osan iha ne’ebá, bele halo kompra emerjénsia”, deputada ne’e sujere.
Tuir Maria Barreto, bainhira vasina anti raiva mak laiha ne’e problema iha jestór sira, tantu husi Ministra, Vise-Ministru komu jestór sira instituisaun autonóma sira oinsá atu antesipa ida-ne’.e.
“Bainhira iha Parlamentu foti beibeik kona-ba moras raiva ne’ebé komesa da’et to’o iha Aileu, ita bele iha supozisaun iha tempu badak bele mai iha Dili, tanba besik malu hela”, nia preokupa.
Deputada ne’e husu Ministériu Saúde (MS), Institutu Nasionál Farmaséutika Produtu no Medikamentu, Institutu Públiku (INFPM, I.P), Ministériu Agrikultura, Peska, Pekuária no Floresta (MAPPF) no instituisaun autonóma sira seluk tenke antesipa ona ba falta vasina kontra raiva nian.
Aleinde ne’e, deputadu CNRT, Gabriel Soares, kontinua solisita ba entidade kompetente atu halo vizilánsia, liuliu iha Dili atu sulan animál ne’ebé la’o livre tanba vírus ne’e da’et ona.
Nia mós fó hanoin ba komunidade atu labele husik animál livre no di’ak liu sulan iha uma no lori ba vasina hodi halo prevensaun ba vírus referidu.
Ba prevensaun ba moras raiva mak bainhira asu tata ema tenke hamoos no fase kedas kanek fatin durante minutu sanulu no lori kedas pasiente bá vasina, nune’e prevene sintoma labele mosu. Tanba la’e nia fatalidade ne’e mosu 100% no labele salva.
Tuir dadus, ema ne’ebé mate tanba pozitivu raiva hamutuk na’in-hitu no husi númeru ne’e Oekusi tolu, Bobonaro rua, Ermera no Kovalima kada iha ida.
Notísia relevante: https://tatoli.tl/2025/07/07/hngv-rekonese-estoke-vasina-anti-raiva-mamuk/
Jornalista: Nelson de Sousa
Editora: Maria Auxiliadora
