OEKUSI, 09 Jullu 2025 (TATOLI) – Sekretáriu Estadu Toponímia no Organizasaun Urbana (SEATOU), Germano Santa Brites Dias, hamutuk ho Autoridade Rejiaun Administrativa Espesiál Oekusi Ambeno (RAEOA), tersa ne’e alerta ba komunidade sira-ne’ebé okupa rai Estadu iha bairru Kiumaria no Palaban ba to’o Lifau atu labele halo uma permanente, no hahú ohin ba oin buka ona fatin, tanba iha tempu ruma Estadu sei halo dezenvolvimentu iha fatin referidu.
“Sasán Estadu nian ne’e, Estadu nian, ita labele utíliza Estadu nian sai fali privadu, iha loron ida kuandu Estadu presiza, nia rai ka uma tenki sobu, semak halo nia uma iha Estadu nia rai, hahú husi Kiumaria, Palaban sorin to’o aeroportu nia rohan ba Lifau, tenki arrenda ba Estadu, no loron ida Estadu presiza tenki sai no entrega ba Estadu, depois tenki agradese ba Estadu tanba ita goza ona Estadu nia sasán ona durante tinan barak, ne’ebé haree buka fatin daudaun ona, tenki koopera,” dehan SEATOU bainhira hala’o vizita ba otél foun ida, besik monumentu Lifau.
Notísia relevante:24 Abríl, SEATOU husu negosiante iha merkadu Numbei-Oekusi hamamuk fatin
Iha sorin seluk, Sekretáriu Rejionál ba Asuntu Administrasaun, Andre La’o, lembra katak antes Governu atribui ona notifikasaun tanba iha sidadaun balu halo uma hodi fó aluga maibé laiha kontribuisaun ba kofre Estadu.
“Iha tinan kotuk, Governu fó ona notifikasaun ba sira idak-idak, ne’ebé hela iha rai Estadu, hahú agora sira tenki prepara-aan atu bele sai husi ne’ebá, tanba tempu ida Estadu sei uza rai ne’e ba dezenvolvimentu, ita observa balu halo uma andar fó aluga, maibé laiha arrenda ka hatma taxa Estadu, ne’ebé hahú ohin ba oin tenki buka ona fatin, ita haree merkadu Numbei mamuk ona, entaun faze tuir mai ita sei hasai mós sira iha Kiumaria, Palaban ba to’o Lifau, tanba barak mak hela iha rai Estadu,” nia dehan.
Notísia relevante:Abitante na’in-154 iha merkadu Numbei koopera ho SEATOU sobu rasik sira-nia uma
Entretantu, bairru Kiumaria no Palaban lokaliza iha aldeia Sanane suku Costa sub-rejiaun Pante Makasar no Lifau tama ba suku Lifau.
Jornalista: Abílio Elo Nini
Editór: Rafael Ximenes de A. Belo
