SSK Bobonaru rejista kazu asu tata ema 27, konfirmadu asu rua pozitivu raiva
BOBONARU, 09 Jullu 2025 (TATOLI)—Sentru Saúde Komunitária (SSK) Postu Administrativu Bobonaru Vila, hahú husi fulan-Janeiru to’o 08 Jullu tinan ne’e, rejista kazu asu tata ema hamutuk 27. Husi númeru ne’e, rezultadu rapid-teste hatudu katak asu rua (ida iha Suku Oe-Leu no seluk iha Suku Leber) konfirmadu pozitivu vírus raiva.
“Kazu asu tata ema ne’e hamutuk 27 no depois asu rua mak pozitivu vírus raiva bazeia ba rezultadu teste ne’ebé ekipa veterinária iha Maliana halo,” Xefe SSK Bobonaru, Cesaltino Maia informa iha Bobonaru, kuarta ne’e.
Cesaltino haktuir katak pasiente hirak ne’e maioria simu ona vasina, maibé daudaun ne’e estoke vasina iha farmásia SSK Bobonaru limitadu.
Notísia relevante: Prevene raiva, DSMJM husu komunidade suku 18 iha Bobonaru sulan animál
Aleinde ne’e, Xefe Suku Oe-leu, Januario Meta-Tae Bragança, preokupa tanba asu iha nia suku simu ona vasina, maibé nafatin infetadu vírus raiva.
“Ha’u deskonfia nafatin. Tanba saida mak bainhira seidauk vasina asu sira-ne’e moras ne’e nunka akontese, maibé to’o vasina ne’e hotu tiha mak moras raiva ne’e agora sírkula ona iha Timor-laran. Lahatene tanba saida ne’e doutór sira mak hatene. Depois, iha ha’u-nia suku, sira bá vasina sein koñesimentu ba ami, derepente nadodon bá iha ne’ebá. Loloos ne’e fó informasaun mai ami tanba ami mak besik-liu povu. Presiza informa uluk para ami fó hatene komunidade prepara asu sira simu vasina,” nia kestiona.
Enkuantu, tuir dadus husi Departamentu Vijilánsia Epidiomolojia Diresaun Servisu Munisipál Saúde Autoridade Munisípiu Bobonaru, hahú husi fulan-Janeiru to’o 06 Jullu tinan ne’e, rejistadu kazu asu tata ema hamutuk 184 no asu 13 mak konfirmadu pozitivu vírus raiva.
Jornalista: Sergio da Cruz
Editór: Xisto Freitas da Piedade
