Vise-Ministru Estatál monitoriza funsionamentu SSK Bobonaru Vila
BOBONARU, 10 Jullu 2025 (TATOLI)–Vise-Ministru Administrasaun Estatál, Jacinto Rigoberto ho ekipa iha tersa horisehik hala’o vizita surpreza ba Sentru Saúde Komunitária (SSK) Postu Administrativu Bobonaru, Munisípiu Bobonaru.
Vise-Ministru Jacinto Rigoberto informa katak Ministériu Administrasaun Estatál (MAE) hetan delegasaun kompeténsia atu monitoriza jestaun fasilidade saúde, atendimentu no prestasaun saúde ba komunidade.
Nia haklaken vizita ne’e atu apár situasaun no difikuldade ne’ebé SSK Bobonaru enfrenta, nune’e bele reforsa no apoiu Ministériu Saúde iha Orsamentu Jerál Estadu 2026.
Notisia Relevante: SSK Bobonaru husu INFP responde ai-moruk vasina tipu tolu
“Ha’u mai para atu haree imi-nia kondisaun, ekipamentu, imi-nia difikuldade saida-saida tan mak presiza urjente no pertenente. Ha’u husu bele hato’o pedidu para ami halo koordenasaun ho saúde no sira seluk atu ita bele responde,” nia hateten iha Sentru Saúde Bobonaru.
Iha biban ne’e, Xefe SSK Postu Administrativu Bobonaru, Cesaltino Maia relata jeralmente atendimentu saúde la’o ho di’ak no infraestrutura mós sufisiente, maibé daudaun ne’e só enfrenta problema kona-ba menus ambulánsia no médiku iha Postu Saúde Lour, Sibuni no Leber.
“Ha’u presiza tebes médiku. Agora postu tolu ne’e infermeiru ho parteira mak prenxe iha-ne’ebá, médiku laiha. Depoiz, ami presiza ambulánsia tanba suku hira ne’e kuandu moras iha ami tenke bá tula mezmu dook no depoiz karreta (ambulánsia) ne’e mós aat beibeik. Tan ne’e mak ami presiza tan ambulánsia ida,” nia hakotu.
Aleinde ne’e, Vise-Ministru Jacinto Rigoberto mós observa direta implementasaun projetu reabilitasaun rezidénsia pesoál saúde SSK Bobonaru ne’ebé ezekuta ho Orsamentu Planu Dezenvolvimentu Integradu Munisipál (PDIM) 2025.
Enkuantu, SSK Bobonaru nia área kobertura kompostu husi Suku Lour, Molop, Sibuni, Ai-Asa, Leber, Oe-Leu, Tapó, Bobonaru Vila no Malilait.
Jornalista: Sergio da Cruz
Editór: Xisto Freitas da Piedade
