DILI, 10 Jullu 2025 (TATOLI) – Bankada Partidu Demokrátiku (PD) reafirma nia kompromisu atu halo alterasaun ba Lei Pensaun Vitalísia, ho objetivu mak hakarak kontribui ba dezenvolvimentu nasionál.
Xefe bankada PD, Manuel Noronha, dehan iha lejizlatura sira liubá halo ona alterasaun ba Lei Pensaun Vitalísia ne’ebé deputadu sira uluk kuandu mandatu hotu simu pensaun 100%, maibé agora hatún ona ba 65%.
“Ita nafatin iha hanoin tenke halo alterasaun. Partidu Demokrátiku [simu] kualkér desizaun iha Parlamentu, tanba ami-nia prinsípiu mak hakarak kontribui ba dezenvolvimentu rai ida-ne’e”, nia hato’o.
Internalmente, bankada PD ko’alia ona kestaun referida, maibé hanesan bankada ki’ik ne’ebé iha de’it kadeira neen iha Parlamentu labele halo buat hotu. Nune’e, buka atu aprosima ho bankada boot sira.
“Ami iha kompromisu hakarak ka lakohi antes ami-nia mandatu hotu tenke halo alterasaun”, nia reitera.
Entretantu, Xefe Bankada Fretilin, Aniceto Guterres, argumenta katak sira-nia parte la promete atu halo alterasaun ba Pensaun Vitalísia. “Ami nunka promete pensaun vitalísia ba ema. Di’ak liu ita-boot sira husu ba bankada Governu, tanba sira mak durante ne’e halo promesa”, nia sujere.
Relembra katak Prezidente Parlamentu Nasionál, Maria Fernanda Lay, promete sei fó prioridade mós ba alterasaun Lei Pensaun Vitalísia iha tinan ne’e.
Maski nune’e, sesaun lejizlativa daruak Parlamentu Nasionál atu ramata ona, maibé seidauk iha inisiativa ruma atu aprezenta iha plenária kona-ba alterasaun Lei Pensaun Vitalísia ne’ebé antes ne’e sai kompromisu husi bankada parlamentár sira.
Notísia relevante : https://tatoli.tl/2025/01/17/pn-fo-prioridade-ba-lei-lima-no-altera-pensaun-vitalisia-iha-tinan-2025/
Jornalista: Nelson de Sousa
Editora: Maria Auxiliadora
