MKI oferese formasaun ba Grupu Jenuferdes prodús mina-nuu
VIKEKE, 10 Jullu 2025 (TATOLI)—Ministériu Komérsiu Indústria (MKI) liuhusi Diresaun Indústria Manufatureira oferese formasaun ba Grupu Jenuferdes husi Suku Uma Ua’in Kraik, Postu Administrativu Vikeke Vila, Munisípiu Vikeke kona-ba prosesu prodús mina-nuu ho kualidade.
Reprezentante Ministru Komérsiu Indústria (MKI) atuál Diretór Rekursu Umanu iha MKI, Jorge Pereira haktuir ekipa MKI oferese formasaun ba Grupu Jenuferdes ne’ebé iha inisiativa hakarak prodús mina-nuu nune’e MKI oferese formasaun ba sira, ho objetivu atu eleva grupu sira-nia koñesimentu hodi hasa’e kreximentu família liuhusi produsaun mina-nuu.
“Ha’u sente formasaun ne’e hodi hasa’e sira-nia koñesimentu kona-ba produsaun mina-nuu ne’ebé garante kualidade atubele substitui produtu importasaun sira, maski ita hotu hatene atu substitui produtu importasaun ne’e difísil,” Jorge Pereira hateten ba jornalista sira, hafoin ramata enserramentu formasaun ba Grupu Jenuferdes, iha Naeboruk, Vikeke, kinta ne’e.
Jorge subliña, formasaun ne’e MKI mós oferese mákina dulas mina-nuu no mákina presaun nuu ba Grupu Jenuferde hodi reforsa sira-nia produsaun mina-nuu.
“Ho apoia sira-ne’e hodi garante produsaun ninia kontunidade produsaun atu grupu ne’e labele mate iha dalan klaran. Ha’u sadik grupu sira atu iha konsisténsia hasa’e produsaun mina-nuu sai barak liután hodi substitui mina importadu,” nia hato’o.
Nia rekoñese, Munisípiu Vikeke nuu barak nune’e fiar katak grupu ida-ne’e sei la mate no sei halo produsaun mina-nuu tanba nuu barak.
Iha fatin hanesan, Reprezentante Koordenadór Grupu Jenuferdes, Rita Pinto Sarmento hato’o agradesimentu ba MKI ne’ebé oferse ona formasaun ba Grupu Jenuferdes no apoia ekipamentu ba grupu.
“Ami iha interese te’in mina-nuu ne’ebé ho kualidade hodi fa’an ba konsumidór sira. Durante ne’e, ami-nia dezafiu mak fasilidde sira hanesan mákina dulas nuu, maibé MKI apoia ona ami hodi reforsa ami-nia grupu ba produsaun mina-nuu,” nia hato’o.
Grupu Jenuferdes harii iha tinan 2025 ho totál membru grupu hamutuk na’in-sanulu (10) kompostu husi feto na’in-sia (9) no mane ida. Grupu ne’e foku ba produsaun mina-nuu.
Iha enseramentu formasaun ne’e, partisipa husi autoridade lokál, Komandante Polísia Nasionál Timor Leste (PNTL) Eskuadra Vikeke Vila, funsionáriu MKI nasionál, MKI Munisípiu Vikeke no komunidade Suku Uma Ua’in Kraik.
Jornalista: Vitorino Lopez da Costa
Editór: Xisto Freitas da Piedade
