DILI, 10 Jullu 2025 (TATOLI) – Tékniku husi Ministériu Obra Públika (MOP) identifika projetu konstrusaun balun ne’ebé ezekuta husi empreza sira la kumpre padraun tékniku, nune’e deside hodi sobu.
Iha totál obra 14, inklui konstrusaun estrada, drenajen, bronjon no seluk tan, ne’ebé lokaliza iha Dili no munisípiu seluk.
Ministru Obra Públika, Samuel Marçal, esplika katak projetu sira ne’e sobu tiha atu halo sai kualidade, nune’e bele uza ba tempu naruk. Medida ida-ne’e halo tanba liuhusi teste laboratoriál verifika katak empreza balun kahur masa ka simentu ba halo fondasi ka bronjon la forte, balun uza fali besi ba halo drenajen no seluk tan.
“Atu ita labele gasta beibeik osan ba fatin ne’ebé hanesan ne’e tenke sobu. Ida-ne’e ba sé de’it mak kaer projetu tantu [empreza] nasionál no internasionál. Ne’e prinsípiu ministériu nian”, Samuel Marçal dehan ba Tatoli, iha Palásiu Governu, Dili.
Governante ne’e salienta katak bainhira tékniku sira sobu projetu iha fulan-Fevereiru to’o Juñu tinan ne’e, hanorin mós empreza sira oinsá atu halo obra ida ho kualidade tuir padraun, no mós akompaña nafatin serbisu sira.
Tuir governante, projetu sira ne’ebé tékniku husi Diresaun Nasionál Laboratóriu sobu ne’e la afeta ba orsamentu.
Samuel Marçal mós relata kona-ba progresu kontrusaun ba infrastrutura tomak, nia parte rekoñese balun la’o tarde, liuliu iha munsípiu sira tanba kauza husi mudansa klimátika ka udan hodi afeta ba serbisu empreza nian.
Notísia relevante: Autoriza ona despeza ba projetu ualu husi MOP
Jornalista: Arminda Fonseca
Editora: Maria Auxiliadora
