PM Xanana apela ba joven sira hametin amizade no unidade

KOVALIMA,10 Jullu 2025 (TATOLI)- Primeiru Ministru (PM), Kay Rala Xanana Gusmão, alerta ba joven sira atu hametin amizade no unidade no hapara envolve-aan iha Grupu Arte Marsiál (GAM) no Arte Rituál (GAR) hodi kria instabilidade iha rai-laran.

“Ba imi joven-sira estuda labele estraga malu no labele fiar Grupu Arte Marsiál no Arte Rituál hodi estraga unidade entre joven no komunidade sira hodi estraga ita nia rai“, Xefe Governu Xanana Gusmão, apela ba joven sira iha inaugura projetu kanalizasaun bee-moos iha postu Fohorem-Kovalima, ohin.

Xefe Governu nafatin fó hanoin ba joven sira atu kuidadu-an tanba envolve iha Grupu Arte Marsiál no Arte Rituál bele estraga família, sosiedade inklui la kontribui ba estabilidade iha suku laran.

Hafoin ne’e, Xefe Governu ne’e orienta ba Prezidente Autoridade Munisípiu (PAM)  Kovalima, Miguel Armada Cardoso, atu halibur joven sira, nune’e joven sira labele envolve iha GAM no GAR hodi foku de’it ba estudu.

“Ha’u husu ba joven-sira atu kria amizade no unidade hodi kontribui ba estabilidade no foku ba kontribui prosesu dezenvolvimentu nasionál”, Apela PM Xanana.

Notisia relevante:PM Xanana husu Kovalima-oan prepara simu desentralizasaun administrativa no podér lokál

Jornalista:Celestina Teles

Editór: Florencio Miranda Ximenes