KOVALIMA,10 Jullu 2025 (TATOLI)- Primeiru-Ministru, Kay Rala Xanana Gusmão ho Ministru Obra Públika, Samuel Marçal ho nia komitiva inaugura fornesimentu bee-moos ba Komunidade iha suku Fohorem, Postu Administrativu Fohorem, Munisípiu Kovalima.
Molok atu hala’o atividade inaugurasaun lia nain sira husi suku Fohorem, simu Primeiru Ministru ho lia dadolin tuir kultura Fohorem, munisípiu Kovalima.
Notísia relevante:PM Xanana husu ema hotu hadomi malu no hadomi ambiente
Hafoin simu ho lia dadolin, PM Xanana kontinua tau ai-funan no sunu lilin iha rate matebian Alferis Ricardo ne’ebé mate iha 1975.
Durante prezensa, Xefe Governu iha postu administrativu Fohorem- Kovalima, Prezidente Autoridade munisípiu Kovalima ho nia estrutura hamutuk ho komunidade sira simu ho entusiazmu.
“Ohin ita inaugura tiha fornesimentu bee-moos hanesan parte ida ami lori ona no responde imi nia halerik sira”, Primeiru-Ministru, Xanana Gusmão hato’o iha nia diskursu molok inaugura fornesimentu bee-moos iha postu Fohorem ohin.
Xefe Governu afirma kontinua rona hela preokupasaun komunidade sira ne’ebé mak administradór postu Fohorem aprezenta kona-ba infraestrutura bàzika.
Iha fatin hanesan, Prezidente Konsellu Administrasaun Bee Timor-Leste, Empreza Públika, Gustavo da Cruz, dehan prosesu fornesimentu bee-moos ba komunidade Fohorem ne’e fahe ba pakote kanalizasaun no instalasaun ba tanke rezervatóriu.
“Projetu kanalizasaun no instalasaun tanke ita gasta osan rihun $700-resin bele fornese bee-moos ba uma-kain 200-resin ho totál populasaun 2000-resin iha Postu Administrativu Fohorem, MunisÍpiu Kovalima”, nia afirma.
Prosesu implementasaun projetu iha Fohorem durante fulan-neen, tanba kestaun klíma no materiál ka ekipamentu importa husi rai li’ur, nune’e implementa projetu durante tinan ida-resin foin mak halo inagurasaun.
Governu kompromitidu baze ba Planu Estratéjia Dezenvolvimentu Nasionál iha kapitál Postu Administrativu 51 ne’ebé iha prioridade no iha faze implementasaun projetu iha kapitál munisípiu sira ne’ebé finaliza ona iha postu administrativu hitu no daudaun finaliza ona hein faze inaugurasaun
Notísia relevante:Konstrusaun uma 63 ba família afetadu aeroportu Suai atinje ona 21%
Jornalista:Celestina Teles
Editór: Florencio Miranda Ximenes
