DILI, 10 Jullu 2025 (TATOLI)—Prezidente Repúblika (PR), José Ramos Horta, rekoñese rezolve kampu petrolíferu, Greater Sunrise la fasil maibé daudaun negosiasaun kontinua la’o hela no Governu hahú loke konkursu ba infraestrutura iha Natarbora.
“Ha’u hatene negosiasaun Greater sunrise la’o nafatin ho Austrália, prosesu ne’e lá’os fasil. La’os Austrália la konkorda Greater Sunrise ne’e, lá’os ona problema, mais negosiasaun kona-ba impostu, kona-ba regra oin-oin ne’e, tanba operasaun sei nafatin Timor ho Austrália. Timor-Leste labele halo mesak unilaterál, ita mak iha maioria iha Greater Sunrise. Timor GAP mak investidór boot,” PR Horta hateten ba jornalista sira iha abertura Konferénsia internasionál ‘Sidade Amiga’ Timor-Leste no Austrália, iha salaun Ministériu Negósiu Estranjeiru no Kooperasaun (MNEK), Praia dos Coqueiros, Kinta ne’e.
Notísia relevante : Timor-Leste no Austrália halo kontaktu intensivu ba negosiasaun Greater Sunrise
Xefe Estadu nota, Autoridade Petroleu no Minerál (ANP) no Timor GAP serbisu maka’as atu hetan akordu ida ho entidade sira ne’ebé hola parte.
Horta mós otimista katak tinan ne’e sei iha solusaun ba dezenvolvimentu Greater Sunrise.
PR dehan, Indonézia mós agora prontu atu hahú negosiasaun fronteira marrítima.
“Primeiru, ita rezolve tiha fronteira terrestre depois mak hakat ba fronteira marrítima, maibé agora Indonézia komunika ona, prontu atu hahú negosiasaun fronteira marrítima,” nia tenik.
Antes ne’e, iha loron 12 Maiu 2025, Ministru Petróleu no Rekursu Minerál, Francisco da Costa Monteiro, hateten, ANP no Timor GAP hahú re-estabelese negosiasaun projetu kona-ba Greater Sunrise hafoin Austrália iha ona Primeiru-Ministru foun.
“Ami fiar katak iha semana ida ka rua mai, sei iha kontaktu intensivu filafali para re-estabelese hodi intensifika filafali negosiasaun sira ne’e hodi bele hetan rezultadu iha tempu badak,” nia katak.
Maski nune’e, prosesu negosiasaun la’o intensivu tebes, molok eleisaun Austrália. Iha fulan hirak liubá la’o neineik uitoan tanba Austrália tama hela prosesu eleisaun.
Jornalista : Osória Marques
Editora : Julia Chatarina
