BOBONARU, 10 Jullu 2025 (TATOLI)—Servisu Munisipál Agua, Saneamentu no Ambiente (SMASA) Autoridade Munisípiu Bobonaru sei rezolve problema bee-moos iha Aldeia Aidabaleten, Suku Hataz, Postu Administrativu Atabae, Munisípiu Bobonaru iha tempu badak.
Xefe Departamentu Planeamentu SMASA Autoridade Munisípiu Bobonaru, Adriano Belo hateten ekipa sira tun ona ba terrenu no identifika katak sistema bomba eleérika labele halo operasaun hodi fornese bee ba komunidade tanba rai-lakan estraga kabu ka fiu eletrisidade no kontadór.
“Ami kontatu ona ho xefe suku atu ko’alia ho parte kompetente hadi’a fiu ne’e no koko bomba ne’e sei di’ak ka lae. Kuandu aat mak ami foin hadi’a, tanba ami foin lalais sosa bomba haat. Rezerva sei iha,” nia informa ba jornalista sira iha kna’ar fatin, kinta ne’e.
Entretantu, Xefe Suku Hataz, Justino Laco Mali dehan sistema ne’e avaria entre fulan Janeiru ho Fevereiru 2025 liubá kauza husi rai-lakan.
Notísia Relevante: Uma-kain 167 iha Aidabaleten asesu ona Bee-Moos
Nia solisita ekipa SMASA ho parte kompetente atu rezolve iha fulan ne’e nia laran tanba problema ne’e afeta ba komunidade atu asesu bee-moos.
“Rai-lakan estraga tiha komunidade atu asesu bee-moos. Oras ne’e daudaun komunidade tenke kuru bee-moos iha mota no bee-matan sira seluk,” nia haktuir.
Enkuantu, sistema bee-moos utiliza bomba elétrika ne’e konstrui liuhusi projetu Programa Nasionál Dezenvolvimentu Suku (PNDS) tinan 2021 ho totál orsamentu rihun $45 ne’ebé benifísia uma-kain purvolta 160-resin iha Aldeia Aidabaleten inklui Aidabaslala.
Jornalista: Sergio da Cruz
Editór: Xisto Freitas Piedade
