DILI, 10 Jullu 2025 (TATOLI)—Operadór telekomunikasaun, Telemor ofisialmente lansa ona identidade no marka foun ne’ebé hatudu katak empreza ne’e fornese servisu telekomunikasaun tradisionál ba empreza dijitál sira hodi hatudu ninia kompromisu akompaña Timor-Leste iha ninia viajen atu kria sosiedade dijitál ne’ebé komprensivu no sentradu iha komunidade.
Mudansa ne’e kompostu husi kór ba marka ne’ebé antes ne’e kinur sai laranja, lema ne’ebé antes ne’e ‘Hetan di’ak liu’ sai ‘Di’ak liu’.
Diretór Jerál Telemor, Vu Duc Nguyen, hateten transformasa ne’e hanesa viajen ida durante dékada ida.
“Rebranding (mudansa ba marka) la’ós de’it mudansa ida ba imajen ka mensajen, maibé mudansa ida husi hanoin no lalaok. Ami sempre fiar katak sosiedade dijitál ida-ne’e bele dezenvolve no sustentável ho elementu umanu. Ho marka ‘inovasaun’, ema hotu sei halo inovasaun ba teknolojia iha inovasaun foun. hahú ho pergunta: Ida-ne’e halo povu Timor nia moris sai di’ak liután ka lae,” Diretór empreza hato’o liuhusi nota ne’ebé Ajénsia TATOLI asesu, Kinta ne’e.
Telemor rekoñese iha tinan 13 ikus ne’e lema ‘Hetan di’ak liu’ (Lori moris di’ak liu) sai nu’udar parte familiár ida iha sosiedade timoroan. Hateten ‘Hetan di’ak liu’ sai hanesan maneira ida ne’ebé familiár atu identifika funsionáriu Telemor.
Nune’e, kontinua ho espíritu lema foun ‘Di’ak Liu’ ne’ebé simples iha liafuan maibé nakloke liu iha espíritu: la’ós ona entrega husi sorin balun, Telemor agora fó kbiit ba ema atu kria moris di’ak ho amizade konsisténsia husi teknolojia ba Telemor no komunidade.
Notísia relevante : Reforsa kapasidade, Telemor lansa servisu komersiál 5G
Aleinde ne’e, kór marka muda ba laranja hanesan espresa kriatividade, juventude, entuziazmu no dinamizmu. Tipu Logo foun iha aspetu modernu, teknolójiku no movimentu, reflete espíritu pioneiru no adaptasaun lalais ba tempu.
Kurva rua ne’ebé kma’an forma sírkulu movimentu nian ne’ebé kontinua, simboliza relasaun sira no dezenvolvimentu sustentável. Dezeñu ne’e subliña letra ‘e’, ne’ebé reprezenta era teknolójiku no ‘mor’, ne’ebé signifika domin iha lian lokál, espresa Telemor nia kompromisu: teknolojia ba povu timoroan.
Iha Telemor nia viajen foun, Telemor habelar mensajen: ho nia kapasidade teknolójiku no valór prinsipál sira ‘Kuidadu – Kriativu – Determinadu’, Telemor sei sai nafatin apoiante forte ba povu, Governu no Estadu Timor-Leste.
Iha ámbitu Timor-Leste ofisialmente adere ba ASEAN no haka’as-an atu integra profundamente ho rejiaun no mundu, espíritu ‘Determinadu’ la’ós de’it kompromisu internu Telemor nian maibé mós konvite ida ba ema hotu atu hamutuk halo inovasaun, hakat ba oin no domina futuru dijitál ida ne’ebé modernu no nakonu ho esperansa.
Tuir Diretór Jerál Telemor, Vu Duc Nguyen, Rebranding hanesan desizaun estratéjiku ne’ebé ajuda Telemor atu aliña ninia identidade ho ninia diresaun dezenvolvimentu, inspira inovasaun husi organizasaun nia laran, hatán ba espetativa kliente sira ne’ebé aumenta ba beibeik no iha tempu hanesan Telemor hametin nia vantajen kompetitiva iha kontestu ne’ebé konkorente sira halo mudansa barak.
“Ida-ne’e mós hanesan oportunidade ida ba Telemor atu hasa’e nia pozisaun no hala’o knaar pioneiru iha jornada integrasaun rejionál tanba Timor-Leste ofisialmente sadere ba ASEAN no habelar gradualmente nia ligasaun ho mundu,” Vu Duc Nguyen hato’o.
Hahú husi tinan 2013, Telemor la’ós de’it tama iha merkadu Timor-Leste ho kliente millaun ida resin, Iha tinan dahuluk, Telemor hasa’e nia pozisaun lideransa ho kuota merkadu 52% no alkansa to’o 96%.
Durante dékada ida resin, Telemor sempre sai hanesan pioneiru iha teknolojia no servisu dijitál sira: hahú husi lansamentu rede 4G, lansa eSim, teste 5G to’o dezenvolve karteira eletrónika Mosan no super apps Kakoak, TimorTV.
Telemor defende produtu hirak ne’e la’ós de’it teknolojia, maibé mós kona-ba solusaun prátika sira hodi hadi’a ema-nia moris.
Aleinde sai nu’udar operadór telekomunikasaun ne’ebé kontribui ona sirkulasaun orsamentu nasionál, fornese empregu ba ema lokál 2.000-resin no implementa programa sosiál sustentável sira hanesan edukasaun, saúde no tulun emerjénsia.
Kontribuisaun hirak-ne’e rekoñese ona ho sertifikadu méritu 05 husi Governu Timor-Leste no prémiu internasionál prestijiozu 07, ne’ebé sai hanesan testemuña ba marka ida-ne’ebé forte no laran di’ak.
TATOLI
