BTL husu abitante Galusapulu-Pipgalak no Mahui atu kuida bee-moos
BOBONARU, 10 Jullu 2025 (TATOLI)—Koordenadór Bee Timor-Leste, Empreza Públika (BTL, E.P.) Delegasaun Territoriál Munisípiu Bobonaru, Adriano da Cruz, konxiensializa abitante sira iha Aldeia Galusapulu, Suku Lahomea no Aldeia Pipgalak II, Suku Tapó-Memu no Aldeia Mahui, Suku Ritabou, Postu Administrativu Maliana, liuliu sira-ne’ebé hela besik bee-matan atu kuida bee-móos duké estraga.
Adriano da Cruz hato’o afirmasaun ne’e tanba durante ne’e ekipa BTL, E.P. identifika iha terrenu ema deskoñesidu iha aldeia tolu referidu sempre sulan bee hodi dada fali ba sira-nia nesesidade privada.
Nia argumenta asaun ilegál ne’e barrala tiha sistema to’o rezulta intupidu no afeta kedas ba kliente sira iha parte Lesubote, Ha’uben, Buipira ho área seluk parte foho-lolon susar atu hetan bee-moos liuliu iha tempu bailoron tanba sistema kanalizasaun ne’e direta, la’ós asesu liuhusi sistema bomba elétrika.
Responsavel másimu BTL Munisípiu Bobonaru ne’e esklarese Estadu kanaliza bee-mos ne’e ba ema atu konsume ba nesesidade bázika diária, la’ós utiliza ba atividade seluk, ezemplu hanesan rega-modo, haki’ak-ikan, fó hemu ba animál, fase karreta ho motór no seluk tan.
“Husu ba komunidade Aldeia Galusapulu ho Mahui labele sulan bee no mós Aldeia Pipgalak labele hasai bee arbiru, tanba dalaruma hasai bee prioriza liubá animál sira, ai-horis, ortikultura, duké sira hanoin ema sira iha fehan ne’e,” nia informa ba jornalista sira iha nia kna’ar-fatin, kinta ne’e.
Notísia Relevante: To’o trimestre daruak, BTL Bobonaru halibur reseita liu rihun $18
Adriano afirma daudaun ne’e aldeia Galusapulu infrenta problema menús bee-moos tanba sistema kanalizasaun bee-moos intupidu.
Iha biban ne’e, Adriano apela ba komunidade Maliana liuliu sira ne’ebé hela iha suku no aldeia sira parte fehan atu poupa bee no uza tuir nesesidade, tanba tempu bailoron débitu bee iha bee-matan ezistente menus.
Kona-ba asuntu sulan bee, Xefe Aldeia Galusapulu, Henrique Surik deklara situasaun ne’e akontese duni no asaun ema deskoñesidu nia ne’e perturba distribuisaun bee-moos ba komunidade.
“Ha’u husu ba joven sira se kaer-toman ema deskoñesidu ne’e, di’akliu lori ba polísia tanba bee ne’e la’ós Galisapulu mesak mak uza, más ne’e ema Maliana tomak uza,” nia katak.
Tuir dadus, konsumidór bee-moos iha Postu Administrativu Maliana hamutuk 1.200-resin.
Jornalista: Sergio da Cruz
Editór: Xisto Freitas Piedade
