BOBONARU, 08 Jullu 2025 (TATOLI)–Bee Timor-Leste, Empreza Públika (BTL, E.P.) Delegasaun Territoriál Munisípiu Bobonaru, hahú husi trimestre dahuluk to’o trimestre daruak tinan 2025 ne’e halibur reseita hamutuk liu rihun $18 hodi kontribui ba kofre Estadu.
Koordenadór BTL, E.P. Munisípiu Bobonaru, Adriano da Cruz, esplika katak reseita hirak-ne’e halibur husi kliente sira iha Urbana Maliana Vila no Postu Administrativu Kailaku ne’ebé durante ne’e utiliza metru kontadór no instala bee-moos iha uma-kain sira.
Notisia Relevante:BTL, E.P: Jere tempu fornese bee ba komunidade
“To’o loron ida-ne’e ita akumula ona reseita liu rihun $18 iha área Urbana Maliana Vila no Kailaku,” Adriano da Cruz informa ba jornalista sira iha nia kna’ar fatin, Soso, Maliana, segunda ne’e.
Atu arrekada reseita barak liután, Adriano haktuir BTL Bobonaru hahú implementa projetu melloramentu sistema bee-moos ne’ebé sei foku uluk ba área urbana.
“Agora daudaun BTL hakarak liberta tiha lai nivel postu administrativu ne’ebé mak nu’udar área urbana, nune’e bele fó netik reseita ba ita-nia Estadu. Se lae mak ita tinan 20-resin bee-moos ita uza gratuita hotu,” nia informa.
Responsavel BTL Munisípiu Bobonaru ne’e haklaken projetu melloramentu sistema bee-moos iha Postu Administrativu Kailaku konkluidu no estabelese ona metru kontadór ba kada uma-ka’in liu 200 no aplika ona tabela tarifária hodi selu taxa ba Estadu.
Da Cruz relata katak daudaun ne’e projetu rua mós la’o hela iha Postu Administrativu Lolotoe ne’ebé tuir planu faze dahuluk sei estabelese metru kontadór ba uma-kain 172, enkuantu iha Postu Administrativu Balibó sei monta metru-kontadór 373.
Kona-ba Postu Administrativu Bobonaru, Koordenadór ne’e tenik empreza estatál ne’e sei kontinua tau prioridade tanba sei halo estudu, maibé ba Postu Administrativu Atabae iha ona faze negosiasaun ho parte Ministériu Interiór tanba sistema perfurasaun ne’e eziste iha lokalidade Unidade Polisía Marítima nian.
“Tanba ne’e sei presiza akordu ruma, maibé ita tenta buka fali fatin seluk ne’ebé mak komunidade karik bele fó espasu ruma,” nia katak.
Enkuantu, BTL Munisípiu Bobonaru identifika aldeia 20-resin mak sei enfrenta problema ba bee-moos, maibé tau ona prioridade hodi rezolve liuhusi Programa Nasionál Dezenvolvimentu Suku (PNDS) inklui hetan apoia husi parseiru balun.
Jornalista: Sergio da Cruz
Editór: Xisto Freitas da Piedade
