CARE International prepara ai-han tonelada 580 ba estudante iha munisípiu tolu
DILI, 11 Jullu 2025 (TATOLI)–CARE International ho kooperasaun husi Governu liuhusi Ministériu Administrasaun Estatál (MAE) prepara ona ai-han tonelada 580 ba estudante hamutuk 70.000 iha munisípiu Ainaru, Ermera no Oekusi.
“Apoia ne’ebé mak sei distribui ba estudante sira iha munisipiu rua (Ainaru no Ermera) ho Rejiaun Oekusi mak koto makerek tonelada 200, foos tonelada 300 no mina tonelada 80, ne’ebé mak sei benefisia ba estudante hamutuk 70.000,” Ministru Administrasaun Estatál, Tomás do Rosário Cabral informa ba jornalista sira iha salaun Nobre Ministériu Negósiu Estranjeiru no Kooperasaun (MNEK), Praia dos Coqueiros, Sesta ne’e.
CARE International halo akizasaun sasán ho kuantidade tonelada 580, ne’ebé transporta ho ró ba eskola sira.
“CARE International nia apoiu ba programa Merenda Eskolár termina ona, nune’e sira mak sei fahe apoiu ne’e direitamente ba alunu sira iha Ainaru, Ermera no Oekusi. Fatin tolu ne’e mak sira foti tanba dehan nível nutrisaun kiik liu. Maibé ida-ne’e halo parte ba avaliasaun ne’ebé sira fó mai mudansa lejislasaun ne’e, korrespondénsia ba labarik sira ba eskola komesa di’ak,” Ministru katak.
Notísia relevante :Autoridade RAEOA no CARE introdús matadalan hodi garante implementasaun merenda eskolár
Molok ne’e, reprezentante husi MAE no CARE International halo enkontru, ne’ebé fó sai katak munisípiu Dili no Manatutu implementa programa ne’e 68%.
Aleinde ne’e, implementasaun programa Merenda Eskolár ne’e iha trimestre dahuluk CARE International aloka osan no trimestre tuir mai ne’e Governu mak aloka, nune’e parte rua bele halo hotu monitorizasaun.
“Sira-nia relatóriu hotu-hotu di’ak, iha 68% seidauk mak Manatutu no Dili, signifika sira implementa seidauk másimu. Ne’e avaliasaun ne’ebé CARE halo. Tanba ne’e, husu ba Autoridade Munisípiu rua ne’e tanba saida?,” Ministru tenik.
CARE husu tanba normalmente Janeiru, Fevereiru no Marsu sira mak aloka osan iha munisípiu tolu ne’e.
“Tanba ne’e sira husu Governu atu tau fali osan ba programa ne’e. Ita iha obrigasaun ita tenke tau, sira la tau ita tau hela,” Governante ne’e hato’o.
Iha sorin seluk, Ministru apresia ho kolaborasaun ho CARE International liuhusi akordu kooperasaun ne’ebé mak estabelesidu iha tinan hirak liubá.
“Agradese mós ba apoia ai-han sira ne’ebé mak CARE International prepara no sei distribui ba estudante sira iha munisipiu Ainaru, Ermera no Rejiaun Oekusi,” nia katak.
Parte MAE sei halo koordenasaun di’ak ho Autoridade Munisípiu no líder komunitária sira kona-ba loron distribuisaun sasán husi CARE no presiza koordena mak ajenda no fatin.
Jornalista : Osória Marques
Editora : Julia Chatarina
