OÉ-CUSSE, 31 Jullu 2024 (TATOLI) – Sekretaria Rejionál Edukasaun no Asuntu Sosiál koopera ho Ministériu Administrasaun Estatál (MAE) no CARE, liuhusi Programa HATUTAN (Hahán ne’ebé Atu fó Tulun ho Nutrisaun no Edukasaun) introdús matadalan merenda eskolár ba dirijente eskola sira atu garante implementasaun programa ne’e iha Rejiaun Administrativa Espesiál Oé-Cusse Ambeno (RAEOA).
Sekretária Rejionál Edukasaun no Asuntu Sosiál, Inácia Tamele, informa sensibilizasaun matadalan ne’e hala’o durante loron rua, kuarta no kinta, iha Eskola Bázika Filiál (EBF) 30 Agostu Masin, ho objetivu atu fó koñesimentu ba diretór, adjuntu no koordenadór eskola sira oinsá atu implementa Programa Merenda Eskolár ne’e tuir manuál ne’ebé iha.
“Dirijente eskola sira persiza hatene loron efetivu no loron feriadu, tanba iha manuál merenda eskolár ne’e fó de’it ba loron efetivu iha prosesu ensinu aprendizajen, ne’ebé sira tenke kumpre regra ne’ebé hakerek iha manuál ne’e”, Inácia Tamele dehan.
Iha sorin seluk, Xefe Programa Edukasaun no Nutrisaun husi CARE, Nicole Seibel, promete sei apoia atividade divulgasaun ne’e, tanba merenda eskolár ne’e nu’udar programa Governu nian.
“Inisiativa di’ak atu fahe esperiénsia ho implementasaun bazeia ba Dekretu-lei númeru 61/2022, kona-ba estabelesimentu Programa Merenda Eskolár no manuál ne’e foin lansa iha tinan 2023 iha munisipíu sira, nune’e persiza uniformiza nia implementasaun”, nia esplika.
Koordenadór EBF 30 Agostu Masin, Belarmino Beto, agradese tanba liuhusi diseminasaun bele hatene oinsá garante programa ne’e ho di’ak iha eskola.
Notísia relevante: RAEOA aloka rihun $305-resin hodi finansia merenda eskolár ba loron 40
“Ami hanesan dirijente iha eskola tenke hatene, nune’e bele asegura implementasaun merenda eskolár iha eskola ho di’ak no bazeia ba matadalan ne’ebé iha”, nia realsa.
Tuir artigu 2 husi Dekretu-lei númeru 61/2022, Programa Merenda Eskolár nia natureza mak hanesan subsídiu ne’ebé Estadu fó iha ámbitu asaun sosiál eskolár atu asegura direitu ba refeisaun saudavel, ekilibradu, kada loron ba kada estudante, refeisaun ne’ebé indispensavel ba labarik sira-nia dezenvolvimentu atu promove sira-nia ensinu aprendizajen.
Notísia relevante: Komisaun G iha PN husu hadi´a implementasaun merenda eskolár
Aleinde ne’e atu garante labarik hotu ne’ebé tama iha estabelesimentu edukasaun pré-eskolár no ensinu báziku, integradu iha rede oferta públiku Estadu nian, sei simu refeisaun diária ho konteudu alimentár saudavel, ekilibradu no independente ba sira-nia dezenvolvimentu no insentiva sira-nia partisipasaun iha edukasaun pré-eskolár. Nune’e mós iha ensinu báziku hodi promove sira-nia prosesu ensinu aprendizajen, aleinde ne’e, hamenus risku pobreza ba labarik ho idade eskolár.
Servisu Edukasun RAEOA aloka $305.306,40 husi Orsamentu Jerál Estadu (OJE) 2024 nian hodi finansia Programa Merenda Eskolár ba loron efetivu 40. Merenda eskolár ne’e ho alvu ba estudante hamutuk 18.173.
Notísia relevante: ME prevee rihun $35 atu superviziona programa merenda eskolár
Jornalista: Abílio Elo Nini
Editora: Maria Auxiliadora
