OÉ-CUSSE, 17 Abríl 2024 (TATOLI) – Servisu Edukasun Rejiaun Administrativa Espesiál Oé-Cusse Ambeno (RAEOA) aloka $305.306,40 husi Orsamentu Jerál Estadu (OJE) 2024 nian hodi finansia Programa Merenda Eskolár ba loron efetivu 40.
Diretór Sevisu Edukasaun Oé-Cusse, Vincencio Cono, informa katak merenda eskolár ne’e ho alvu ba estudante hamutuk 18.173.
“Proposta [husi Departamentu Asaun Sosiál Eskolár] ne’e tama ona iha parte finansa hodi prevee ba estudante sira iha Pré-Eskolár hamutuk 748 no Ensinu Báziku hamutuk 17.425. Ita kalkula fali ba orsamentu atu aloka, kada alunu ida nia han loron ida sentavu $0,42, prevee ba loron efetivu 40 iha segundu períodu”, Vincencio Cono ba Agência Tatoli, iha otél Ambeno, ohin.
Diretór Edukasaun ne’e la esplika detalla kona-ba eskola hira maka sei asesu ba Programa Merenda Eskolár ne’e, maibé ein jerál sei envolve mós eskola privada sira kompara ho tinan hirak liubá alvu ba de’it eskola públika sira.
Notísia relevante: Programa merenda eskolár iha Oé-Cusse sei iha faze elaborasaun
Tanba ne’e, atu impelementa programa ne’e, Vincencio Cono hateten depende ba aprovasaun husi parte finansa no bainhira orsamentu ne’e sai, sei implementa iha segundu períodu, maibé ninia data serteza atu implementa seidauk fiksu, tanba depende ba aprovasaun proposta.
“Se aprova ona iha semana ne’e, ita sei konvoka reuniaun ho dirijente eskola, inklui mós ho fornesedór sira bainhira iha mudansa ba kalendáriu karik sira bele hatene atu implementasaun tenke la’o ho uniforme”, nia informa.
Notísia relevante: UNMICS koordena ho RAEOA ba implementasaun Programa Alimentasaun Integrada
Iha 2023, Sekretaria Rejionál ba Asuntu Edukasaun no Solidariedade Sosiál implementa merende eskolár ho alvu ba estudante hamutuk 18.691, kompostu hosi alunu Ensinu Báziku 17.980 no Pré-Eskolár hamutuk 711, husi Pré-Eskolár 12 iha Oé-Cusse ho totál orsamentu millaun $1.
Jornalista: Abílio Elo Nini
Editora: Maria Auxiliadora
