CNC realiza feira kultura rezisténsia populár iha 14-16 Jullu
DILI, 11 Jullu 2025 (TATOLI)-Instituti Publiku, Centro Nacional Chega! (CNC, I.P) realiza espozisaun feira kultura rezisténsia popular hahú husi loron 14 to’o 16 fulan Jullu 2025, hodi selebra loron aniversáriu ba da-ualu (4).
Notísia Relevante: CNC, I.P define forma rua ba implementasaun sítiu istóriku iha territóriu nasionál
Diretór Ezekutivu CNC, Hugo Maria Fernandes, hateten, festivál kultura rezisténsia (feira livru) nuudar eventu anuál ida ne’ebé maka Centro Chega! halo.
“Eventu ida ne’e atu hatudu oinsá mak konseitu arte no kultura sai nuudar komponente importante iha ita-nia moris nian,” Diretór Ezekutivu Centro Nacional Chega, Institutu Públiku (CNC, I.P), Hugo Maria Fernandes, hateten ba jornalista sira iha salaun konferénsia CNC, Antigu Komarka Balide, ohin.
Dirijente ne’e hatutan, iha mós espresaun ba direitu determinasaun ne’ebé mak mai husi múzika, poema ho lala’ok artístika fundamentál ida-nian.
Atividade iha sira ne’e atu realiza iha feira kultura rezisténsia populár durante loron tolu (3) ne’e mak hanesan feira livru, espozisaun artístika, murál, instalasaun, ezibisaun fotográfia, murál painting, konferénsia, Book Talk, arte ba labarik, reklamasaun ooézia rezisténsia, no animasaun husi banda múzika famozu sira hanesan KLAMAR, ALKATRAZ, INFERNO no seluk tan.
Jornalista : Alexandra da Costa
Editór : Cancio Ximenes
