Primeiru-Ministru husu ferik no katuas kontinua transmite kultura ba joven sira
KOVALIMA,11 Jullu 2025 (TATOLI)- Primeiru-Munistru, Kay Rala Xanana Gusmão, husu ba ferik no katuas sira iha postu administrativu Maucatar, munisípiu Kovalima atu kontinua transmite kultura ba joven-sira.
“ Katuas sira labele haluha atu transmite nafatin ita-nia kultura ba labarik sira tanba kultura mak ita nia hun no ita nia abut. se la’e joven-sira ko’alia de’it lian inglés no portugés, nune’e ita-nia kultura bele lakon tiha”, PM Xanana Gusmão, transmite mensajen ne’e iha postu administrativu Maucatar,ohin.
Xefe Governu dehan, Ferik no katuas sira kontinua transmite hodi hanorin nafatin oan sira atu konserva nafatin kultura, tanba ne’e presiza atu ka’er metin nafatin kultura, nune’e sai povu nia abut mai husi hun no abut husi kultura.
“Maske kada munisípiu diferénsia kultura maibé, nia dalan ida de’it, kultura diferénsia mak hanesan dansa kultura iha munisípiu Kovalima mós la hanesan ho munisípiu sira seluk, maibé presiza atu kaer nafatin kultura”, Xanana afirma.
Aleinde ne’e, PM Xanana mós fó hanoin ba joven sira tenke iha unidade nasionál hodi kria pás no estabilidade armonónia iha komunidade nia le’et hodi kria domin.
Notisia relevante:PM Xanana lansa fatuk dahuluk ba reabilitasaun estrada pakote rua iha Maucatar
Jornalista:Celestina Teles
Editór: Florenco Miranda Ximenes
