PM Xanana lansa fatuk dahuluk ba reabilitasaun estrada pakote rua iha Maucatar
KOVALIMA,11 Jullu 2025 (TATOLI)- Primeiru-Ministru, Kay Rala Xanana Gusmão, akompaña husi Ministru Obra Públika, Samuel Marçal, lansa fatuk dahuluk ba projetu reabilitasaun estrada pakote rua, iha Postu Adminitrativu Maucatar, Munisípiu Kovalima.
Molok, Primeiru-Ministru to’o Postu Administrativu Maucatar, Komunidade, autoridade lokál no alunu husi Eskola Bázika Filial 11 de Março, forma hodi simu xefe Governu atu hala’o atividade lansamentu fatuk dahuluk reabilitasaun Estrada referidu.
Notísia relevante:PM Xanana inaugura projetu kanalizasaun bee-moos iha Fohorem
Hafoin to’o iha fatin atividade tau fatuk ba dahuluk lia-nain sira husi postu administrativu Maucatar simu Xefe Governu ho lia-dadolin tuir kultuta Maucatar.
“Ohin, ita mai hala’o lansamentu fatuk dahuluk reabilitasaun estrada iha postu Maucatar. Ita hamutuk hodi espresa ita-nia kontente saida mak atu halo tuir iha Planu Estratéjiku Dezenvolvimentu Nasionál”, Xefe Governu hato’o hafoin lansa fatuk dahuluk reabilitasaun estrada iha postu Maucatar, ohin.
Nia dehan, Governu haka’as-an atu kumpre PEDN 2011 to’o 2030 iha setór infraestutura bázika liuliu estrada sira.
“Ita halo buat ida la’ós hetan naran boot maibé atu kumpre mehi ne’ebé husi martir sira ne’ebé fò aan ba rai ne’e,” katak PM
Nune’e, Xefe Governu fò hanoin ho osan ne’ebé iha obrigasaun gasta ho di’ak no garante projetu nia kualidade.
Projetu reabilitasaun estrada pakote rua ne’e hanesan reabilita estrada husi suku Ogues bá iha Leogore ho kilometru 10, ne’ebé ezekuta husi empreza JLC L.da ho empreza Aitula Lda reabilita estrada hahú iha foho-rua to’o Leogore, postu Maucatar ho hilometru hitu ho nia durasaun implementasaun fulan-18 ho totál orsamentu $3,101,895.22.
Enkuantu reabilitasaun estrada husi foho-rua, suku Ogues bá Leogore, suku Holpilat, postu Maucatar ka’er husi empreza Dany Star Unip Lda JV ho DMF Unipesoàl Lda ho durasaun tempu fulan-12 ho totál orsamentu $2,420.446.93.
Notísia relevante:PM Xanana husu Kovalima-oan prepara simu desentralizasaun administrativa no podér lokál
Jornalista:Celestina Teles
Editór: Florencio Miranda Ximenes
