Sekretáriu Estadu Fernandino orienta CGF kontrola komersializasaun ai-maran iha Batugadé-Balibó
BOBONARU, 11 Jullu 2025 (TATOLI)—Sekretáriu Estadu Floresta (SEF), Fernandino Vieira da Costa orienta Korpu Guarda Floresta (CGF-sigla portugeza) atu kontrola komunidade ne’ebé halo komersializasaun ai-maran iha dalan ninin Diresaun Batugadé ba Postu Administrativu Balibó, Munisípiu Bobonaru.
Fernandino Vieira hato’o orientasaun ne’e durante sensibiliza informasaun ba komunidade Postu Administrativu Balibó kona-ba proteje no konserva rekursu naturál iha área kosteira ho objetivu atu konxiensializa komunidade labele tesi ai-arbiru no sunu-rai.
Governante ne’e subliña CGF iha obrigasaun atu fó protesaun no konserva rekursu naturál ne’ebé konsagra ona iha Konstituisaun RDTL.
Notisia Relevante: Ecosecurities distribui fugaun enerjia ba suku 10 iha munisípiu tolu
“Laiha tan ema ida halo komersializasaun ka fa’an ai iha dalan ninin sein autorizasaun tanba ne’e kontra lei,” nia hateten durante hala’o enkontru ho komunidade iha Balibó, sesta ne’e.
Fernandino Vieira haklaken Administrativu Balibó daudaun ne’e sai fatin risku ba erosaun (rai-halai), nune’e sei la autoriza komunidade tesi ai arbiru hodi halo komersializasaun tanba asaun ne’e fó impaktu ba jerasaun sira iha futuru.
Enttetantu, Xefe Suku Sanirin, Francisco Travares hateten momunidade kontinua fa’an ai-maran iha dalan ninin tanba númeru Korpu Guarda Floreta menus atu halo kontrolu.
“Ami Balibó ne’e iha suku neen (6), maibé Guarda Floresta na’in-tolu de’it, ne’ebé dalaruma ema tesi ai fa’an atu hato’o keixa más guarda la perkore tomak suku neen referidu. Sira na’in-tolu kontrola de’it iha estrada ninin. Tanba ne’e, ami husu atu aumenta rekursu guarda floresta nune’e perkore hotu ai-laran sira,” nia propoin.
Ba kestaun ne’e, Sekretáriu Estadu Floresta promete molok mandatu ramata sei rekruta tan guarda floresta na’in-200 atu koloka ba postu administrativu no suku sira iha Timor laran hodi kontrola no asegura rekursu naturál.
Jornalista: Sergio da Cruz
Editór: Xisto Freitas Piedade
