DILI, 11 Jullu 2025 (TATOLI)–Diretór Servisu Edukasaun Munisípiu (SEM) Ainaru, Patrício da Costa Magno, hateten, nia parte komunika ona ba Ministériu Edukasaun (ME) atu fó xamada ba responsável konstrusaun edifísiu Sentru Aprendizajen no Formasaun Eskolár (CAFE, sigla portugés) iha Ainaru.
“Ha’u ko’alia ona ho Ministériu Edukasaun tanba orsamentu finansia husi sira, tanba ne’e ita ko’alia ona atu halo karta xamada ba empreza karik la kontinua ita sei hapara atubele haree fali empreza seluk atubele aselera lalais hodi finaliza projetu ne’e atu nune’e tinan oin bele uza ona,” Diretór Edukasaun munisípiu Ainaru, hato’o ba Ajénsia TATOLI, iha salaun Nobre Ministériu Negósiu Estranjeiru no Kooperasaun (MNEK), Praia dos Coqueiros, Sesta ne’e.
Notísia relevante : Edukasaun Ainaru halo ona avaliasaun ba preparasaun ezame períodu daruak
Nia dehan, empreza nia kapasidade limitadu atu kaer obra ho orsamentu boot. Tanba ne’e, konstrusaun foin atinje pursentu 15.
“Ne’ebé orsamentu haruka ona ba maibé seidauk kontinua, entaun la transfere ona ona,” nia katak.
Empreza ne’ebé mak responsabiliza ba konstrusaun CAFE naran Roman Junio, ho nia orsamentu ne’e hamutuk $907.735,20, ne’ebé konstrusaun ne’e hahú iha tinan 2020.
Diretór relata, eskola ne’e iha Hatu-udu, ne’ebé ho nia saladeaula neen, eskritóriu ida, laboratóriu ida, maibé to’o agora seidauk remata.
Kona-ba infraestrutura eskola iha projetu sia ne’ebé bolu PKL, projeitu komunitáriu iha tinan 2023 to’o 2024.
“Kona-ba infraestrutura eskola nian, ita iha projetu komunitáriu, ba tinan kotuk iha 2023 to’o 2024 ita hetan sia, ne’ebé mak to’o agora la’o hela, maibé projetu sia ne’e hotu ona, ualu mak entrega, no eskola utiliza tiha ona, maibe sei falta eskola EBF mantu, postu Maubisse mak sei falta kaza-de-bañu mak sei hadi’a hela, maibe ita orienta ona tékniku sira ba halo fiskalizasaun,” nia tenik.
Jornalista : Osória Marques
Editora : Julia Chatarina
