DILI, 12 Jullu 2025 (TATOLI)–Federesaun Futeból Timor-Leste (FFTL), Sábadu ne’e, halo lansamentu ba planu estratéjiku futeból ba feto 2025-2028, iha Hotel Timor.
Membru Komité Ezekutivu iha FFTL, Domingos Caero, hateten, planu estratéjiku ne’e importante tebes atu dezenvolve futeból feto no labarik feto iha Timor-Leste.
“Eventu ohin importante, desde federasaun harii iha tinan hirak liubá foin ita halo planu estratéjiku ida oinsá hateke ba oin hodi guia prosesu dezenvolvimentu futeból feto,” nia hato’o.
Aleinde ne’e, hanesan planu ida atu prepara an no atu kumpre rekezitu sira ne’ebé mai husi Fédération Internationale de Football Association (FIFA) rasik. Tanba ne’e, ekipa téknika federasaun prepara planu hahú iha tinan 2024 no ohin halo lansamentu.
“Planu estratéjiku ne’e hanesan guiaun ida oinsá futeból feto bele la’o tuir hodi prepara-an dezenvolve di’ak liután,” nia akresenta.
Notísia relevante : FIFA halo refreska nasionál ba árbitru timoroan 36 iha TL
Planu ne’e mós sai referénsia ida, la’ós dezenvolve de’it iha nível nasionál maibé ho esperansa hahú tinan oin bele hahú ona realiza atividade liga jogu la’ós de’it futebol feto maibé ba mós juveníl labarik feto iha nível eskolár no komunitáriu iha territóriu.
“Oinsá eleva partisipasaun labarik feto ho feto iha futeból. Tanba modalidade ida-ne’e importante tebes hanesan nasaun tenke tau importánsia ba ita-nia feto sira iha futebol,” Domingos Caero, tenik.
FFTL nia kompromisu atu dezenvolve futeból feto iha Timor-Leste ne’e envolve husi parte hotu inklui parseiru no Governu rasik.
Iha fatin hanesan, Ofisiál Futeból Feto Timor-Leste iha FFTL, Lizia Magno, hateten, planu estratéjiku ne’e hala’o ho objetivu atu hasa’e partisipasaun feto iha futeból, liuliu ba jogadór no atleta, treinadór, arbitrajen no administradora feto sira ne’ebé hola parte iha lideransa futeból.
“Esperansa maka bainhira implementa planu estratéjiku ida-ne’e bele hasa’e partisipasaun feto sira iha futeból no bele atende atinje meta sira ne’ebé refeleta ona iha planu ne’e rasik,” nia hato’o.
Implementasaun ba planu estratéjiku ida-ne’e bele asegura kriteira FIFA, ne’ebé foka liu atu iha atividade feto ne’ebé espesífiku ba dezenvolvimentu liga feto no dezenvolvimentu kapasidade feto sira tantu jogadór halo mós kampaña no promosaun futeból feto iha Timor-Leste.
Jornalista : Nelson de Sousa
Editora : Julia Chatarina
