DILI, 14 Jullu 2025 (TATOLI)-Xefe Estadu Maiór Jenerál Forsa Armada, Tenente Jenerál Domingos Raul Falur Rate Laek, aprova ona pedidu pasa rezerva husi Koronél Domingos Camara “Amico” no Koronél João Silva Pereira “Sadia Rasik Laek”.
“Ha’u simu duni karta husi Koronél na’in-rua, Koronél Amico no Sadia. Sira na’in-rua mak hato’o pedidu hodi husu pasa ba rezerve, la’ós reforma. Sira na’in-rua nia karta ha’u aprova ona, ne’ebé pasa ona ba rezerva”, Tenente Jenerál hatete ba jornalista sira iha Komponente Navál Hera, segunda–ne’e.
Nia dehan administrativamente pedidu referidu aprova ona. “Ha’u aprova ona iha fulan rua liubá, agora sira na’in-rua Koronél Amico no Sadia la’o tun sa’e buka riku iha liur ne’ebá”.
Razaun ne’ebé mensiona iha karta pedidu mak atu deskansa. “Sira kole ona, tanba desde uluk labarik mak kaer buat ida kilat ne’e halo buat hothotu, oho ema no agora sira hakarak rekopera sira-nia tensaun ho nervu para halo sira-nia moris ho di’ak liután”, nia esplika.
Falur fundamenta, Komandu F-FDTL sei fó tratamentu ne’ebé di’ak ba Koronél na’in-rua ne’ebé pasa ona vida rezerva.
“Komandu agora prepara kondisoins ho nia médiku sira para halo tratamentu regulár, prepara klínika no internamentu. Karik grave, ami rekomenda ba poder desizór sira lori ba rai li’ur hodi halo tratamentu hanesan sidadaun seluk. Ha’u hanoin tratamentu ba sira rua en-jerál dignu”, nia konklui.
Tuir dekretu-lei númeru 7/2014, 12 Marsu konaba estudu militár F-FDTL nian artigu 128 ne’ebé ko’alia kona ba kondisaun bainhira pasa ba rezerva, kuandu membru F-FDTL atinje ona idade 55 bele hato’o nian pedidu ba Xefe Estadu Maiór Jenerál Forsa Armada (XEMGFA) atu pasa ba rezerva bainhira halo ona servisu ba instituisaun F-FDTL durante tinan-30.
Notísia relevante: Membru F-FDTL liu 100 sei reforma iha 2025
Jornalista : Natalino Costa
Editora : Rita Almeida
