Falur : Ita tenke orgullu ba FALINTIL
DILI, 14 Jullu 2025 (TATOLI)-Xefe Estadu Maiór Jenerál Forsa Armada, Tenente Jenerál Domingos Raul Falur Rate Laek, hatete sente orgullu ho ezisténsia Forsa Armada ba Libertasaun Nasionál Timor-Leste (FALINTIL) ne’ebé sei hakat ba tinan-50 iha 20 Agostu tinan-ne’e.
“Ita tenke orgullu ba FALINTIL, sira tenke orgullu, katuas sira últimu kapítulu, sira haree katak sira vale a-pena sira luta, más rezultadu ohin temi a-forsa profisionál”, Falur hateten iha Komponente Navál Hera, segunda-ne’e.
Tenente Jenerál dehan tan orgullu ba povu no Nasaun tanba husi FALINTIL nia sakrifisiu no luta mak liberta ona Nasaun husi invazaun.
Nia hatutan, FALINTIL iha tempu ukun-an transforma ba forsa moderna hodi dezenvolve-an, agora iha ona komponente terrestre, navál no aero lijeira.
Tenente Jeneral Falur nota katak hafoin FALINTIL tranforma ba forma konvensionál ne’ebé ho naran F-FDTL kompara uluk ho agora iha avansu.
“Imi mak halo avaliasaun di’ak liu, ha’u haree ne’e orgullu. Uniforme iha parade F-FDTL uluk no agora. Antes ha’u sei komandante batallaun, ha’u sei komandante instrusaun, ita hanesan milisia farda ne’e kahur malu tun sa’e, sapeo kahur malu tun sa’e, maibé ohin defaktu hatudu sira (forsa) forma loos ona”, nia adianta.
Iha biban ne’e Falur Rate Laek agradese ba Governu tanba ho esforsu oinoin, maske liuhusi dezafiu sira maibé moderniza FALINTIL ba F-FDTL hodi apoia.
“Ita bo’ot sira haree, tempu to’o ona para ita agradese ita-nia Governu sira ne’ebé halo desizaun polítiku, agradese mós ita-nia komponente hothotu. Saida mak durante ne’e forsa defeza atinje, ida-ne’e esforsu koletivu, la’ós ha’u komandante jenerál de’it, Estadu hotu, komunidade hotu, instituisaun hothotu, NGO mós kumpri sira-nia matenek hodi halo krítika para ita bele halo mudansa, ne’e ita tenke orgullu, sira tenke orgullu”, nia afirma.
Nia lembra estabelesimentu komponente navál ne’e ho bero, depois ho kooperasaun ne’ebé iha Governu apoia ró.
“Ami forma ita-nia komponente Navál, ami hola bero para halo kontrolu ba tasi iha Beasu Vikeke), balun agora aat ona para hela iha tasi ibun Seisal (Baukau) nian, maibé ida ha’u ko’alia ona ba Komandante Komponente Navál ida maka ha’u foin daudaun dehan komandante Navál para dada hotu bero sira mai para tau muzeum. Ita fó nafatin prioridade ba instituisaun forsa nian la’ós ba nesesidade, la’ós ba seguransa terrestre de’it, maibé mós ba iha aero no tasi nian, tanba ida-ne’e afirmasaun soberania”, nia subliña.
Nia dehan, seguransa espasu maritimu ne’e importante, tanba ita haree espasu marítima ne’e luan kompara ho espasu terrestre no Timor-Leste ukun-an ona, espasu iha aero lalehan ne’ebá ne’e afirma soberania Timor-Leste nian.
“Ha’u hakarak meius sira ba komponente sira ne’e iha, maibé ida-ne’e problema polítiku sira-nia, maibé ha’u hakarak ne’e lalais”, nia konklui
Notísia relevante: Falur aprezenta kestaun tolu importante iha aniversáriu transformasaun F-FDTL
Jornalista : Natalino Costa
Editora : Rita Almeida
