Falur aprezenta kestaun tolu importante iha aniversáriu transformasaun F-FDTL
DILI, 02 fevereiru 2025 (TATOLI)- Xefe Estadu Maiór Jenerál FALINTIL- Forsa Defeza Timor-Leste (F-FDTL), Tenente Jenerál Falur Rate Laek, destaka pontu importante tolu iha ámbitu selebrasaun transformasaun FALINTIL ba Forsa Armada ba tinan 24.
Kestaun tolu ne’ebé Tenente Jenerál koloka mak manutensaun ba infrastrutura militár, kontinua hametin kooperasaun militár iha politika externa hodi dezenvolve forsa iha futuru no husu Forsa sira atu respeita povu.
Notísia relevante:Horta husu F-FDTL hametin kooperasaun hodi prevene krime transnasionál no seguransa marítima
“Hadi’a Infra-estrutura militár, ne’ebé presiza esforsu manutensaun ne’ebé boot, sei la sufisiente nafatin atu hadi’a kondisaun moris pesoál militár sira-nian, hanesan apoia médiku no sosiál, hela-fatin no kondisaun saláriu”, Komandante F-FDTL ne’e hato’o iha intervensaun durante selebrasaun transformasaun FALINTIL ba Forsa Defeza Timor-Leste ba dala-24 iha Kuartel Jenerál F-FDTL Fatuhada, domingu ne’e.
F-FDTL kontinua matein kooperasaun internasionál tanba iha tinan ikus-ne’e, entermus kooperasaun militár kontinua asaun kooperasaun bilaterál ho nasaun oioin, neʼebé balun hamutuk ho ona durante jornada tinan 24 no kontinua aposta ba Formasaun militár sira.
Formasaun importante tebes hodi hasa’e kapasidade no abilidade rekursu umanu iha F-FDTL.
“Nune’e, ita destaka iha-ne’e apoiu husi kooperasaun Portugál ninia Forsa Armada, ne’ebé materializa iha formasaun ba Autoridade Marítima iha espesialidade Komandu no ensinu lian portugés”, nia afirma.
Komandante F-FDTL ne’e mós foka administrasaun militár, ne’ebé kompleta formasaun akadémika ezijente iha Akademia Militár Portugál.
Alende ne’e, kontinua kooperasaun ho Austrália, Xina, Japaun, Estadu Unidu Amérika, Brazíl, Nova-Zelándia, Indonézia.
“Permite ona ita la’ós de’it atu hadi’a ita-nia rekursu umanu, maibé mós atu hakmaan no hadi’a infraestrutura iha nível ekipamentu balun. Internalmente”, nia afirma.
Nia hatutan: “Ita halo esforsu atu hakbesik ita nia Forsa Armada ba ita nia populasaun, liuhusi kooperasaun sivil-militár no asaun psikososál, tanba ita fiar katak koezaun sosiál mós asosiadu ho kapitál sosiál konjuntu ida husi valór étiku, morál no kulturál”.
Biban ne’e, Falur mós husu ba membru F-FDTL atu respeita povu no servi povu ho di’ak nune’e povu nafatin tau konfiansa ba forsa sira.
“Lealdade ba povu, Governu, komandante sira no maluk soldadu sira, korajen hasoru adversidade no konviksaun morál ba ita-nia misaun. Inisiativa, iha Ambitu respeitu lei no orientasaun superior sira, respeitu ba povu. Kompañeiru sıra, superior no subordinadu sira”, nia afirma.
Notísia relevante:Padre Adriano Olan husu membru F-FDTL banati espíritu FALINTIL
Jornalista: Natalino Costa
Editór: Florencio Miranda Ximenes
