DILI, 31 janeiru (TATOLI)- Komandu FALINTIL-Forsa Defeza Timor-Leste (F-FDTL), komemora ninia aniversáriu transformasaun husi Forsa Armada ba Libertasaun Nasionál Timor-Leste (FALINTIL, sigla Portugés) ba F-FDTL, ba dala 24, ho misa agradesimentu iha Kapela Sentru Instrusaun Komandante Nicolau Lobato Metinaro, Díli.
Selebrasaun dala-24 aniversáriu transformasaun husi forsa gerilla ba forsa armada, FALINTIL-FDTL hanesan eransa istória FALINTIL nian, ne’ebé sira simu todan hahú iha tinan 1975 to’o 1999.
Notísia relevante:Falur husu sidadaun hotu kontinua depozita konfiansa ba F-FDTL
Iha omilia, Padre Pároku Metinaro, Adriano Olan, dehan ho Maromak nia tulun no eroi sira nia mate mak Timor bele ukun rasik aan, nune’e husu ba membru FALINTIL- Forsa Defeza Timor-Leste (F-FDTL) atu banati tuir espíritu luta FALINTIL nian durante tinan 24.
¨Ohin ita realiza misa agradesimentu ba transformasaun FALINTIL ba Forsa Armada Timor-Leste, nune’e husu ba ita boot sira atu halo reflesaun hodi haree ba kotuk saida mak ita nia FALINTIL sira halo ona. Husi sira-nia aten-berani mak transforma Timor-Leste sai bee-matan ida no oras ne’e sai bee-matan ba Timoroan hotu. Tanba ne’e husu forsa armada tenke banati tuir espíritu ida-ne’e atu tane ita nia rai no ema husi perigu sira,” Padre Adriano Olan iha hatete iha Kapela Sentru Instrusaun Komandante Nicolau Lobato, Metinaro.
Padre mós husu atu forsa sira tenke utiliza arma ho didiak no tuir lei.
Iha fatin hanesan, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek” hateten, misa agradesimentu ne’e importante tanba atu fó onra ba martir sira.
¨Ita tenke agradese ba ita nia-Maromak no ita nia matebian sira tanba ho sira nia mate maki ta ukun rasik aan, nune’e ita ida agora moris tenke fó onra ba sira,¨refere Tenente Jenerál ne’e.
Selebrasaun aniversáriu transformasaun FALINTIL ba Forsa armada, Komandu F-FDTL realiza atividade misa agradesementu no kari ai-funan iha jardín Eroi Matinaro no jardín demokrásia militar hodi fo onra ba martir sira nia luta ba libertasaun nasionál.
Notísia relevante:Membru Komponente Terrestre F-FDTL realiza doasaun ran iha HoREX Baucau
Jornalista: Natalino Costa
Editór: Florencio Miranda Ximenes
