Falur husu sidadaun hotu kontinua depozita konfiansa ba F-FDTL
DILI, 02 fevereiru 2024 (TATOLI) – Xefe Estadu Maiór Jenerál (F-FDTL), Tenente Jenerál, Domingos Raul Falur Rate Laek, husu ba sidadaun hotu atu kontinua depozita konfiansa ba Falintil-Forsa Defeza Timor-Leste (F-FDTL) nu’udar forsa ne’ebé bele defende ameasa rai-laran no rai-li’ur.
“Ita-nia militár tenke kontinua sai nu’udar “Povu nia Militar”. Tanba ne’e ha’u husu ba timoroan hotu atu fó apoiu ba Forsa Armada hodi bele hala’o nafatin sira-nia kna’ar nu’udar militár ne’ebé profisionál ida-ne’ebé serve interese koletivu timoroan hotu nian”, Falur dehan iha nia diskursu durante serimónia aniversáriu ezisténsia tranformasaun FALINTIL ba F-FDTL ba dala-23 ne’ebé hala’o iha kuartel Jenerál F-DTL Fatuhada, sesta ne’e.
Nia afirma, Timor-Leste presiza aposta ba mekanizmu kontrolu tai, tenke matan-moris nafatin hodi hasoru ameasa sira ne’ebé afeta ba interese povu nian.
“Ita tenke kontinua hametin ita-nia mekanizmu kontrolu tasi nian, matan-moris nafatin hodi hasoru ameasa sira ne’ebé bele afeta ita-nia nasaun no ita-nia povu nia pás no estabilidade”, nia informa.
Iha biban ne’e, Tenente Jenerál Falur mós rekoñese durante transformasaun FALINTIL-FDTL durante tinan 23 nia-laran ona maibé iha dezafiu barak mak rekursu umanu limitadu no inefisiénsia téknika, meius no ekipamentu ne’ebé limitadu, inklui alojamentu no lojístika ba F-FDTL ne’ebé sei menus.
“Maske nune’e, ita la nakdoko, ita hotu, koletivamente, fiar metin katak ita-nia hakarak mak atu fó benefisiu ba ita-nia sidadaun sira iha futuru. Investimentu ne’ebé ita halo ona iha forsa armada no ita-nia setór seguransa, ho apoiu maka’as husi ita-nia parseiru dezenvolvimentu sira, fó ona garantia hothotu ba sosiedade”, nia afirma.
Jornalista: Natalino Costa
Editór : Zezito Silva
