FFTL buka jogadór Futsál ba selesaun nasionál

DILI, 14 Jullu 2025 (TATOLI)—Federasaun Futeból Timor-Leste (FFTL) iha esperansa realiza Liga Futsál Timor-Leste (LFTL) hodi buka kandidatu jogadór Futsál ba selesaun nasionál Timor-Leste.

Diretór Kompetisaun Eventu Federasaun Futeból Timor-Leste (FFTL), João Campos esplika hafoin Asosiasaun Futsál Timor-Leste (AFTL) hamutuk ho FFTL halo koordenasaun, konsege reativa hikas kompetisaun Futsál Timor-Leste hafoin paradu iha tinan-2023.

“Ita-nia esperansa la’ós de’it títulu ba klube sira atu hetan maibé konfiansa tomak atu kompetisaun ida-ne’e to’o ramata no bele hetan jogadór ne’ebé kompetativu, selesionadu hodi hetan ekipa selesaun nasionál,” Diretór Kompetisaun Eventu FFTL informa ba TATOLI iha Fundasaun Oriente, Dili, Segunda ne’e.

Notísia relevante: Futsál Timor-Leste okupa ranking 31 iha tabela klasifikasaun AFC

Nia solisita parte tolu hanesan AFTL, komisaun organizadora inklui klube Futsál hotu ne’ebé sei kompete iha liga atu kontinua serbisu hamutuk hodi garante kompetisaun ida-ne’ebé transparente no kualidade nune’e liuhosi kompetisaun referida bele iha jogadór no árbitu ne’ebé kualidade iha futuru.

“Komisaun organizadora ba tinan-ne’e iha preparasaun másima no liña koordenasaun hala’o ho di’ak,” João Campos haktuir.

Liga Futsál Timor-Leste ba Primeira Divizaun sei realiza ho sistema home and away katak klube sira sei kontra malu dala-rua ka full liga, iha-ne’ebé kada klube sei hala’o jogu hamutuk 18 husi ekipa 10 ne’ebé tuir kalendáriu sei halo nia abertura iha loron-18 Jullu.

Enkuantu, Segunda Divizaun sei realiza ho sistema jogu faze grupu A no B, iha-ne’ebé grupu ida sei akumula klube haat husi totál klube ualu ne’ebé kompetisaun sei hahú halo nia abertura iha loron-23 Jullu.

Jornalista: Natalino Belo 

Editór: Xisto Freitas da Piedade