Futsál Timor-Leste okupa ranking 31 iha tabela klasifikasaun AFC
DILI, 14 Jullu 2025 (TATOLI)—Ekipa Selesaun Nasionál Futeból Salaun Timor-Leste (Futsál-TL) okupa ranking 31 iha tabela klasifikasaun rejionál Konfederasaun Futeból Ázia (AFC-sigla ingleza).
Vise-Prezidente Asosiasaun Futsál Timor-Leste (AFTL), Ivan Alves esplika prestasaun referida Timor-Leste gaña tanba entidade hotu-hotu ninia kolaborasaun koletiva.
“Ne’e prova katak Futsál Timor-Leste sai pasu importante iha rejionál no internasionál,” Vise Prezidente AFTL hateten iha Fundasaun Oriente, Dili, Segunda ne’e.
Nia argumenta númeru rangking iha tabela ne’ebé sempre moderadu ne’e simboliza serbisu boot husi jogadór, treinadór, klube, patrosinadór no Federasaun Futeból Timor-Leste (FFTL).
Ivan salienta maski mandatu estrutura FFTL seidauk kle’ur maibé rezultadu hatudu ba públiku katak iha ona progresu signifikante ba dezenvolvimentu desportu iha Timor-Leste.
Nune’e, Ivan informa ba klube Futsál hotu katak Selesaun Nasionál Futsál Timor-Leste sei partisipa iha kompetisaun AFC Liga Futsál Asian Cup 2025-2026 iha nasaun Kizikistaun, fulan-Setembru, tinan ne’e.
Pozisaun Futsál iha tabele AFC hatudu Timor-Leste prenxe iha tabele númeru 31 husi nasaun hamutuk 42, enkuantu tabele FIFA Timor-Leste hetan pozisaun 110 husi totál nasaun 150.
Jornalista: Natalino Belo
Editór: Xisto Freitas da Piedade
