DILI, 14 Jullu 2025 (TATOLI)—Prezidente Movimentu Kamponeza Timor-Leste, Hélio Dias da Silva, hateten atu hamenus mánutrisaun iha Timor-Leste, Governu presiza investe iha setór produtivu hanesan agrikultura, peska no pekuária.
Movimentu Kamponeza Timor-Leste (MOKATIL) ne’e defende konseitu soberania ai-han sira iha toos, natar, tasi-laran, entaun ai-han sira-ne’e tenke ukun rasik-aan ka tenke kuda duni husi agrikultór rasik tanba ai-han nutritivu mak produtu lokál.
“Ami hakarak ai-han nutritivu ne’e ita mak na’in. Signifika hahú husi prosesu kuda to’o ba komsumidór sira-nia liman, entaun ne’e bele garante ai-han ninia fresku no nutrisaun tanba laiha kontaminasaun husi kímiku ruma,” Prezidente MOKATIL ne’e hateten ba Agência Tatoli liuhusi telefónika, ohin.
Nia tenik, ita fiar katak husi ne’e bele hasa’e nutrisaun ba populasaun sira iha Timor-Leste no hamenus mánutrisaun.
Nia hateten, populasaun sira konsumu barak liu mak hahan importasaun tanba sira la haree ba ninia efeitu negativu ba saúde, no populasaun sira konsidera katak importante hahán ne’e iha hodi konsumu no aguenta moris.
“Ita presiza kontrola hahan sira-ne’e, atu labele fó impaktu ba populasaun nia saúde. Tanba, dalabarak mánutrisaun ne’e akontese depende ba ema ida-idak nia konsiénsia no laiha kontrolu,” nia hateten.
Tamba ne’e, MOKATIL rekomenda ba Governu atu aloka Orsamentu Jerál Estadu (OJE) kada tinan tenke tau prioridade mós ba setór produtivu sira hanesan agrikultura, peska no pekuária, tanba populasaun barak mak moris ho agrikultór, hodi prodús produtu lokál ne’ebé nakonu ho nutritivu ba ema atu konsumu.
Jornalista : Alexandra da Costa
Editór : Cancio Ximenes
