PAS na’in-40 iha Oekusi benefísia formasaun kona-ba atendimentu SIIGDSA

OEKUSI, 14 Jullu 2025 (TATOLI) – Ministériu Administrasaun Estatál (MAE) fasilita formasaun ba Pesoál Apoia Suku (PAS) na’in-40 kona-ba atendimentu Sistema Integradu Informasaun Jestaun Dadus Suku no Aldeia (SIIGDSA) durante loron rua iha Rejiaun Administrativa Espesiál Oekusi Ambeno (RAEOA).

Notísia relevante: https://tatoli.tl/2025/02/10/mae-entegra-ekipamentu-eletroniku-ba-it-postu-administrativu-iha-territoriu/

Xefe Departementu Diresaun Nasionál Suku iha MAE, Batista Falo, informa, formasaun ne’e importante ba ofisiál apoia administrasaun suku, tanba serbisu direita ho komunidade sira iha baze.

“Formasaun ne’e realiza durante loron rua, ba ofisiál administrasaun suku no ofisiál asuntu sosiál nian ho nia intensaun atu inserra dadus populasaun ba iha sistema SIIGDSA, ho nia materiál prinsipál durante loron rua ne’e, fokuliu ba livru 18 ne’ebé distribui ona iha kada suku ho nia formatu ba B1 to’o B5,” Batista Falo dehan, iha salaun administrasaun Oekusi.

Livru 18  ne’e koleksaun livru ne’ebé uza iha suku sira iha Timor-Leste atu halo jestaun dadus komunidade. Livru referidu dokumentu informasaun relevante sira kona-ba a) Dadus populasaun: moris, mate, migrasaun; b) Estrutura uma-kain: naran, aldeia, suku; c) Propriedade rai no uma: naran na’in, fatin; d) Atividade dezenvolvimentu: projetu komunidade; e) Governansa lokál: desizaun suku, lideransa tradisionál; f) Seguransa no justisa: kazu problema, solusaun lokál; no seluktan.

Iha biban ne’e, formandu Pesoál Apoia Administrasaun Suku, iha suku Cunha, Maria Audete  Sandriña Asqueli, agradese tanba ekipa nasionál bele fasilita kursu Sistema Integradu Informasaun Jestaun Dadus Suku no Aldeia.

“Ami agradese tebes, tanba ekipa husi nasionál bele mai fasilita formasaun, nune’e bele hasa’e ami-nia koñesimentu no fasilita di’akliu ami-nia servisu kona-ba Sistema Integradu Informasaun Jestaun Dadus Suku no Aldeia, tanba durante ne’e ami rekolla ona dadus populasaun, entaun liuhusi formasaun ne’e bele fasilita oinsá hatama dadus ba sistema,” nia orgullu.

Notísia relevante: https://tatoli.tl/2023/03/29/mae-kapasita-paas-50-iha-bobonaro-utiliza-programa-siigdsa/

Pesoál Apoia Suku na’in-40 ne’e, mai husi suku 20 iha Rejiaun Oekusi, no kada suku delega na’in-rua, komposta husi Pesoál Apoia Administrasaun Suku na’in-ida no Pesoál Apoia Sosiál Suku na’in-ida.

 Jornalista: Abílio Elo Nini

Editór: Rafael Ximenes de A. Belo