DILI, 15 Jullu 2025 (TATOLI)-Komisáriu Adjuntu Komisaun Anti Korrupsaun (KAK) ba asuntu Servisu Apoiu no Koperasaun, Miguel Acacio Farria, klarifika sira-nia prezensa iha Ministériu Saúde la’ós halo buska maibé konfirmasaun ba utilizasaun patrimónia Estadu.
“Horisehik ne’e ami la’ós ba halo buska, maibé KAK nian prezensa iha Ministériu Saúde Kaikoli ne’e tanba ami simu informasaun husi informadu katak iha dirijente Ministériu Saúde balun utiliza karreta ne’ebé apoia husi ita-nia ajénsia internasionál IOM monta xapa matrikula privadu no iha loron fimdesemana uza hodi halo movimentu. Tanba ne’e, ami ba halo konfirmasaun loos ka la’e”, Acacio hateten ba TATOLI via telefone, tersa-ne’e.
Acacio hateten, MS simu apoiu karreta haat husi ajensia internasionál IOM (Organizasaun Internasionál ba Migrasaun). Karreta rua mak muda ona ba xapa matrikula Estadu, maibé iha karreta rua mak seidauk uza xapa matrikula Estadu, nune’e mak tuir informadu balun ne’ebé informa ba KAK katak iha dirijente MS balun privatiza viatura ne’e ba asuntu privadu.
Nia hatutan, tuir loloos KAK halo audiénsia ho Ministra Saúde, Elia dos Reis Amaral, maibé Ministra rejeita pedidu, tanba ne’e muda fali ba tempu seluk.
“KAK nafatin hein disponibilidade husi ministra para halo tiha konfirmasaun ba karreta rua ne’e. Kuandu informasaun loos mak foin loke investigasaun konaba kareta rua ne’e, tanbasa mak privatiza karreta ne’e ba asuntu privadu, no halo manutensaun uza osan Estadu nian, maibé husi investigasaun maka foin hatene”, nia konklui.
Notísia relevante: KAK ezekuta mandadu buska-apreensaun ba kompañia gráfika pátria
Jornalista : Natalino Costa
Editora : Rita Almeida
