Dirijente Eskola EBC 10 Dezembru husu ME reabilita saladeaula neen
DILI, 15 Jullu 2025 (TATOLI)—Diretór Eskola Ensinu Báziku Sentrál (EBC) 10 Dezembru Komoro, Calistro Guteres, husu ba Ministériu Edukasuan (ME) atu halo reabilitasaun ba saladeaula neen iha iha eskola ne’e.
“Ami rekomenda ba Ministériu Edukasaun, karik atu halo reabilitasaun ba eskola sira. Ami husu atu inklui mós 10 Dezembru nia saladeaula neen ne’ebé nia kondisaun ladi’ak ona no labele utiliza ba prosesu aprendizajen,” Diretór Eskola EBC 10 Dezembru, Calistro Guteres, informa ba Ajénsia TATOLI, iha ninia knaar fatin, Komoro, Tersa ne’e.
Parte Eskola EBC 10 Dezembru sei hato’o proposta reabilitasaun saladeaula ba Diresaun Edukasaun munisípiu Dili atubele hato’o ba ME.
“Sala tolu durante ne’e, tantu EBC no Ensinu Sekundáriu Jerál (ESJ) la uza tanba nia kakuluk a’at ona, la garante ba manorin no kanorin sira, nomós sala tolu durante ne’e komunidade mak uza, maibé komunidade husik ona agora abandona no mamuk hela, ne’ebé presiza tebes tulun husi Ministériu Edukusaun,” nia akresenta.
Notísia relevante : ME sei konstrui saladeaula 42 ba eskola Ensinu Báziku
Diretór Eskola dehan, presiza halo reabilitasaun atubele funsiona ba prosesu ensinu aprendizajen ho di’ak.
Eskola EBC 10 Dezembru iha estudante hamutuk na’in-891 ho nia manorin hamutuk na’in-45, kompostu husi mane 24 no feto 21. Enkuantu estudante ESJ hamutuk 700-resin.
Jornalista : Osória Marques
Editora : Julia Chatarina
