Eskola EBC rua simu estudante 77 Rainha da Paz partisipa ezame períodu daruak
DILI, 15 Jullu 2025 (TATOLI)—Eskola Ensinu Báziku Sentrál (EBC) 30 Agostu no EBC 10 Dezembru iha Komoro simu ona estudante hamutuk 77 husi Eskola Rainha da Paz hodi tuir ezame períodu daruak iha semana ne’e.
Estudante husi Eskola Rainha da Paz obrigadu tuir ezame iha eskola seluk tanba eskola ne’e laiha ensinu aprendizajen durante fulan-tolu ona tanba problema internál eskola.
Diretór Eskola EBC 30 Agostu Komoro, Baltazar Borromeu, konsidera, estudante sira hanesan vítima, tanba ne’e eskola sira tenke asegura no tenke fó espasu atu sira bele tuir ezame nune’e bele kontinua estudu.
“Ami simu estudante hamutuk 44 husi fundasaun Rainha da Paz hodi tuir ezame períodu daruak. Estudante ba 90 ano iha na’in-38 no na’in-neen ba 80 ano,” Diretór Eskola hato’o ba Ajénsia TATOLI, iha ninia knaar fatin, Komoro, Tersa ne’e.
Nia dehan, parte eskola seidauk simu valór períodu dahuluk, maibé Ministériu Edukasaun (ME) ho fundasaun buka meiu.
“Ministériu rasik mak sei asegura depois entrega ba eskola ne’ebé sira transfere ba. Karik laiha, tuir orientasaun Ministériu Edukasaun katak ami sei fó ezame filafali nune’e fó valór ba sira. Maibé ha’u garante parte relevante bele buka hetan iha fundasaun tanba iha estudante na’in-haat mak entrega ona kaderneta ne’e. Entaun, ha’u fiar katak seluk mós sei hatama,” nia akresenta.
Notísia relevante : Estudante 371 husi Rainha da Paz kolokadu ba Eskola Públika neen iha Dili
Iha sorin seluk, ezame iha eskola ne’e la’o di’ak tanba fasilidade hanesan saladeaula no monorin iha kompletu.
“Ita iha saladeaula funsionadu hamutuk 24 no fahe ba turnu tolu dadeer ba 90 ano meudia ba 80 ano no lorokraik ba 70 ano, entaun buat hotu-hotu la’o ho di’ak tuir nia dalan,” nia katak.
Eskola EBC 30 Agostu rejista estudante ativu iha 1.895 ho manorin 63 la inklui guarda seguransa no Administrasaun Finansa.
Diretór Eskola EBC 10 Dezembru, Calistro Guteres, informa, sira simu estudante husi Eskola Rainha da Paz hamutuk na’in-33 mak tuir ezame segundu períodu.
“Ami simu ikus estudante Rainha da Paz iha sesta, loron 11 Jullu, hamutuk estudante na’in-33 no husi númeru ne’e, husi 70 ano iha na’in-11 no 80ano iha na’in-22. Ami orienta kedan komisaun organizadora hodi imprime pontu ezame ba sira, nune’e horisehik sira iha direitu hanesan ho estudante sira seluk hodi tuir ezame,” nia tenik.
Notísia relevante : ME sei rezolve problema eskola Rainha da Paz
Ezame hahú husi segunda no ohin ba loron daruak nian, ne’ebé pontu ezame la’o ho di’ak tuir kurríkulu.
“Ita iha obstákulu oituan hanesan estudante sira ne’ebé durante ne’e la tuir prosesu aprendijazen kuaze fulan-ida liu. Tanba ne’e, ami bazeia ba sirkulár Ministériu katak eskola labele halo kontratu ba estudante, signifika katak estudante ne’ebé durante prosesu aprendizajen sira hakmatek iha uma, ida-ne’e ami sei bolu inan aman atu garante ba nia oan no eskola, liuliu tenke pasa deklarasaun,” Diretór eskola hato’o.
Jornalista : Osória Marques
Editora : Julia Chatarina
