DILI, 15 Jullu 2025 (TATOLI) – Tama ona ba tempu bailoro, Sekretáriu Estadu Floresta, Fernandino Vieira, apela ba komunidade labele sunu rai no tesi ai arbiru iha área protejida no foho-lolon sira.
“Husi Juñu tama ba tempu bailoron naruk nian. Ita haree katak iha parte kosta súl, norte, ema barak sei kontinua sunu rai, liuliu iha área hanesan subaun ki’ik, boot, no iha parte Metinaru, Hera no areadór Dili nian hanesan Komoro. Ida-ne’e hanesan atitude umanu ne’ebé ladún di’ak”, governante ne’e hateten iha Timor Plaza.
Tuir nia, atu kuidadu ambiente la’ós de’it ema ida ka rua nia responsabilidade, maibé hothotu nian. Bainhira la kuidadu ambiente, iha tempu udan sei lori sedimentasaun no rai sei halai no monu tanba laiha ai-horis ida atu kaer rai.
Nia husu ba komunidade, liuliu iha Dili ne’ebé hela parte foho-lolon sira labele tesi ka sunu rai arbiru, tanba bainhira tempu udan sidade nakonu ho sedimentasaun.
Daudaun, grupu guarda florestál kontinua halo patrullamentu iha foho atu halo atuasaun ba ema sunu rai no tesi ai arbiru. Bainhira sidadaun sunu rai no tesi ai-arbiru iha área protejida maka sei hetan sansaun no kontinua prosesa tuir Dekretu-lei númeru 5/2016, kona-ba Sistema Nasionál Área Protejida.
“Husu ita hotu kuidadu no prezerva ita-nia ambiente sira risku ba inundasaun. Atu avita atividade ema sunu rai no tesi ai arbiru maka ami mós kontinua halo sensibilizasaun iha munisípiu atu hasa’e koñesimemtu komunidade nian”, dehan.
Notísia relevante: Redús sunu rai arbiru presiza sidadaun sira-nia konsiénsia
Jornalista: Arminda Fonseca
Editora: Maria Auxiliadora
