Top

Prokuradór-Defeza sei rekursu ba aplikasaun pena ba kazu Malang Indonézia

Tribunál Judisiál Primeira Instánsia Dili. Imajen TATOLI/António Daciparu

DILI, 15 Jullu 2025 (TATOLI)-Desizaun Tribunál Judisiál Primeira Instánsia ba kazu taa lezadu JCXB ne’ebé akontese iha Malang Indonézia, iha 2013 hamosu reasaun rekursu husi parte ministériu públiku no defensória públika.

Ministériu Públiku ne’ebé reprezenta husi Prokuradór, Domingos Barreto no Defensora ba arguidu CMX, Laura Valente, la simu desizaun tribunál liuhusi juiza prosesu, Francisco Cabral, ne’ebé atribui pena prizaun tinan-tolu suspende tinan-tolu, no mos obrigasaun selu $1000 ba lezadu.

“Ha’u sei halo rekursu ba kazu ne’e. Tanba faktu provadu katak arguidu halo duni asaun ne’e hodi taa kotu lezadu nia liman, tanbasa mak tribunál aplika fali pena prizaun tinan-tolu suspende ba tinan tolu”, afirma Domingos Barreto hafoin julgamentu iha Kaikoli, tersa-ne’e.

Domingos Barreto konsidera desizaun ne’e la justu, tanba nia parte imputa krime tentativa omisídiu, ofensa integridade fízika grave no krime arma-branka.

“Krime tolu ne’e oinsá mak tribunál aplika fali pena prizaun tinan tolu suspende ba tinan tolu ne’e, desizaun la adekuadu, ne’ebé ha’u sei halo rekursu”, afirma nia.

Enkuantu rekursu husi parte defensória tanba durante prosesu julgamentu arguidu nega faktu sira ne’ebé ministériu públika atribui ba akuzadu.

Juiza prosesu liuhusi desizaun husu ba arguidu ho obrigatoriamente selu danu patrimoniál ba lezadu ho valór $1000 durante fulan-neen nia laran.

“Kuandu arguidu la halo tuir desizaun ne’ebé tribunál hasai mak lezadu nia defeza hatama asaun kontra fali arguidu mai fali tribunál mak autormatikamente sei ba foti sasán hotu ne’ebé arguidu iha, tanba ne’e arguidu iha obrigasaun selu $1000 ba lezadu”, juiza afirma iha sala julgamentu.

Juiza, Francisca Cabral, iha nota desizaun hatete maske arguidu nega faktu ne’ebé aprezenta maibé bazea ba depoimentu Armando Moniz Amaral katak momentu ne’ebá arguidu mak ho katana hamutuk nia kolega ho motór taa lezadu JCXB nia liman to’o kotu.

Notísia relevante: MP solisita tribunál aplika pena prizaun tinan-haat fulan-neen ba arguidu CMX

Jornalista       : Natalino Costa

Editora           : Rita Almeida

Publisidade

Leave a Reply

Latest Post

error: Content is protected !!