DILI, 15 Jullu 2025 (TATOLI)—Sekretária Estadu Asuntu Toponímia no Organizasaun Urbana (SEATOU), Germano Santa Brites Dias, hetan orientasaun husi Primeiru Ministru, Kayrala Xanana Gusmão, hodi asegura ema ho kondisaun defisiénsia psikolójia ne’ebé okupa iha espasu publiku lori ba tau iha fatin ne’ebé seguru no dignu.
“Ida-ne’e la’ós fó orientasaun para ha’u mak iha kompeténsia atu servisu atende ema ho defisiénsia psikolójia ne’e lae. Maibé tanba foin dadauk ne’e, Primeiru Ministru, Kay Rala Xanana Gusmão liu iha estrada boot, hetan maluk ne’ebé sofre psikolójia ne’e. Entaun, xefe Governu husu ha’u-nia ajuda atu lori netik ema-ne’e ba iha fatin seguru,” Sekretáriu Estadu Asuntu Toponímia no Organizasaun Urbana, Germano Santa Brites Dias, informa ba jornalista sira iha Manleu, Has-Laran, ohin.
Nia esplika, antes atu lori ema ho defisiénsia psikolójia ne’e ba fatin seguru, sira fó haris no troka tiha hotu hafoin kontaktu ba parte Ministéria Saúde, entaun ekipa enfermeiru sira mak mai foti lori ba iha ospitál halo tratamentu hotu kontinua lori ba iha madre sira-nia fatin ne’ebé lokaliza iha Tibar.
“Nune’e tanba ema sira-ne’e la’o iha espasu públiku hanesan toba iha trotoar leten, entaun ne’e tama ona iha kategória servisu SEATOU nian ne’ebé durante ne’e halo kontrola ba espasu públiku sira,” governante ne’e hateten.
SEATOU afirma, bainhira sira la’o mak hetan ema ho defisiénsia psikolójia sira iha espasu públiku sira sei la hein tan orientasaun, maibé sei halo servisu ho nonook tuir orientasaun ne’ebe iha. Aleinde ne’e mós tanba ospitál iha hodi halo tratamentu ba ema ho defisiénsia psikolójia sira.
“Servisu ida-ne’e ita mós halo hela koordenasaun ho Ministériu Solidariedade Sosiál no Inkluzaun (MSSI) hodi ajuda fasilita ema sira sofre moras psikolójia ba fatin ne’ebé seguru, depois mak sei kontinua servisu husi parte PRADET no ministériu relevante sira,” nia informa.
Jornalista : Alexandra da Costa
Editor : Cancio Ximenes
