DILI, 15 Jullu 2025 (TATOLI)-Tribunál Judisiál Primeira Instánsia Dili fó prazu loron-10 ba arguidu eis-Ministru Edukasaun, Bendito Freitas, atu hato’o depoimentu ba tribunál, relasiona ho produsaun kaderneta eskolár iha tempu Governu Konstitusionál da-lima.
Audénsia julgamentu ne’ebé prezide husi juiza, Julmiati Freitas, segunda semana-ne’e solisita ba defeza arguidu, advogadu privadu Pedro Camões, halo komunikasaun ho nia kliente atu bele marka prezensa iha prosesu julgamentu ba kazu ne’e.
Antes ne’e iha loron 19 fulan-Janeiru 2024 tribunál halo dispensa ba arguidu tanba asume hela pasta Ministru Negósiu Estranjeiru no Kooperasaun.
Ba kazu ne’e, tribunál rona ona deklarasaaun husi arguidu na’in-10 no tama ona ba faze alegasaun, maibé to’o prosesu ne’e arguidu Bendito Freitas seidauk marka prezensa dala-ida iha sala julgamentu hodi prosede ba julgamentu, hodi hato’o nia depoimentu ba tribunál koletivu relasiona ho kazu ne’e.
Tuir faktu ne’ebé aprezenta hosi ministériu públiku katak kazu ne’e envolve hosi arguidu na’in-11. Husi na’in-11 ne’e inklui ho atuál ministru MNEK.
Arguidu na’in-10 mak AP, FMG, DC, ASP, JMGP, RHA, AFXR, LMR, MM, SS. Sira ne’e mak ekipa servisu ba atividade produsaun kaderneta eskolár.
Produsaun kaderta ne’ebé tuir loloos pájina 40 maibé rezultadu ikus mak empreza prodús pájina 36, no parte governu liuhusi ministériu edukasaun kontinua halo pagamentu ba kompañia. Husi efeitu ne’e, eskola téknika vokasionál munisípiu Bobonaru la utiliza tanba la tuir akordu kuantidade pájina nian.
Ho pagamentu ne’e, ministériu públiku konsidera hamosu prejuizu ba Estadu hodi kondena arguidu Bendito Freitas ho AP, FMG no DG ho krime abuzu poder ne’ebé previstu iha artigu 297 kódigu penal no krime partisipasaun ekonomia no negósiu iha artigu 299.
Enkuantu atribuisaun krime administrasaun danoza iha artigu 274 imputa ba arguidu ASP, JMGP, RHA, AFXR, LMR, MM no SS.
Atribui mos artigu 85 husi kódigu penál ba atuál MNEK, AP, FMG, DC, proibe atu azerse funsaun públika durante tinan-lima.
Notísia relevante: Ministru Bendito Freitas la prezensa iha Tribunál husu konsentimentu Parlamentár
Jornalista : Natalino Costa
Editora : Rita Almeida
