BOBONARU, 15 Jullu 2025 (TATOLI)—Xefe Institutu Nasionál Farmásia Produtu no Medikamentu, Institutu Públiku (INFPM) rejionál Maliana, Munisípiu Bobonaru, João Bruno husu komunidade atu labele pániku ho problema estoke vasina antirábika limitada.
Nia dehan maski daudaun ne’e estoke vasina antirábika limitadu iha ospitál no sentru ho postu saúde balun, maibé kuandu iha akontesimentu asu tata ema, profisionál saúde sira sei buka meiu atu pasiente ne’e bele simu vasinasaun.
“Ha’u-nia mensajen ba komunidade labele pániku bainhira asu tata. Karik rona informasaun dehan vasina iha sentru saúde balun estoke laiha, sei transfere fali ba sentru sira seluk ne’ebé iha vasina antirábika,” nia informa ba jornalista sira iha nia kna’ar fatin, Tersa ne’e.
Notísia relevante: Asu hamutuk 1.575 simu ona vasina antí rabies
João Bruno informa katak iha fulan ne’e nia laran INFPM nasionál sei simu vasina antirábika ho kuantidade boot.
Enkuantu, hahú husi Janeiru to’o 06 Jullu 2025 ne’e, Diresaun Servisu Munisipál Saúde Autoridade Munisípiu Bobonaru rejista pasiente kazu asu tata hamutuk 184. Husi númeru ne’e, maioria simu hotu ona vasina no óbitu na’in-rua la simu vasina.
Jornalista: Sergio da Cruz
Editór: Xisto Freitas da Piedade
