BOBONARU, 16 Jullu 2025 (TATOLI)—Komunidade fiar ho esperansa katak Ministériu Obra Públika (MOP) sei implementa projetu halo reabilitasaun ba estrada iha Postu Administrativu Lolotoe, Munisípiu Bobonaru.
“Ami akompaña iha meídia Ministru Obra Públika ko’alia katak estrada ne’e dezeñu sira prepara ona no hein semana ida tan atu lori bá Komisaun Nasionál Aprovizionamentu (CNA-sigla portugeza) hodi halo prosesu konkursu. Ne’ebé, ha’u hanesan Lolotoe-oan sente kontente no tau-fiar ba Governu iha tinan oin sira ne’e bele lansa ona projetu ne’e,” abitante ida husi Lolotoe, Felisberto de Jesus informa ba jornalista TATOLI iha Maliana, Munisípiu Bobonaru, Kuarta ne’e.
Notísia relevante: Komunidade husu MOP fó prioridade ba estrada ligasaun Tapo-Lolotoe
Nia argumenta MOP presiza tau prioridade ba estrada ne’e tanba tinan barak ona povu halerik no difikulta lori produtu hodi asesu bá merkadu.
“Kuandu udan ami Lolotoe sempre preokupa kona-ba estrada. Husi Lolotoe atu bá Maliana ne’e susar lahalimar. Estrada ne’e afeta ba folin foos no nesesidade bázika sira seluk sa’e,” nia haktuir.
Administradór Postu Administrativu Lolotoe, Sebastião Amaral husu ba CNA atu aselera prosesu konkursu nune’e bele implementa projetu referidu iha tinan oin.
“Se bele loke konkursu agora. Labele muda bebeik. Kondisaun estrada ne’e grave. Tempu udan difikulta tebes komunidade halo movimentasaun,” nia katak.
Enkuantu, Postu Administrativu Lolotoe iha suku hitu, aldeia 20, totál populasaun 7.695 no xefe família hamutuk 1.591.
Jornalista: Sergio da Cruz
Editór: Xisto Freitas da Piedade
