ME distribui ona karteira eskolár 110 ba EBC 10 Dezembru Komoro
DILI, 16 Jullu 2025 (TATOLI)–Governu liuhosi Ministériu Edukasaun (ME) distribui ona karteira eskolár hamutuk 110 ba Ensinu Báziku Sentrál (EBC) 10 Dezembru Komoro, atu garante prosesu aprendizajen ne’ebé di’akliu ba estudante sira.
“Ministériu Edukasaun aprova ona meza 110 no kadeira 110. Ida-ne’e ita bele koloka bá eskola ne’ebé ho kondisaun di’ak. Tuir planu, ami sei prepara oinsá mak eskola ne’e bele halo jestaun ida di’ak iha tinan 2026,” Diretór EBC 10 Dezembru Komoro, Calistro Guterres dehan ba TATOLI iha nia kna’ar fatin, Kuarta ne’e.
Maibé, nia dehan, proposta ideál ne’ebé eskola ne’e presiza hamutuk 250.
“Ida-ne’e ita agradese ba Ministériu Edukasaun. Maski ami husu unidade ne’ebé boot, maibé responde faze pur faze. Entaun, ida-ne’ebé ami hetan ona metade ne’e bele jere oinsá atu utiliza ba sala ne’ebé grave liu, atubele garantia ba estudante sira-nia prosesu aprendizajen,” Calistro informa.
Notísia relevante: ME atribui ona karteira eskolár ba eskola 78
Entretantu, rekursu iha EBC 10 Dezembru hamutuk na’in-891 kompostu husi manorin hamutuk na’in-45 (mane 24 no feto 21) no estudante 700-resin.
Antes ne’e, Diresaun Nasionál Patrimóniu, Lojístika no Teknolojia iha Ministériu Edukasaun (ME), atribui ona karteira eskolár ba eskola sira hamutuk 78.
“Entre Janeiru to’o Maiu ita fahe ona karteira eskolár hamutuk 8.874 (meza 4.279, kadeira 4.595) ba eskola hamutuk 78,” Diretór Interinu, Policarpo Mendes haktuir.
Nia dehan diresaun ida-ne’e rejista eskola hamutuk 78 kompostu husi Pre-eskolár 20, Ensinu Báziku Sentrál no Eskola Bázika Filiál hamutuk 34, no Ensinu Sekundáriu Jerál Públiku no Ensinu Sekundáriu Tékniku-Vokasionál hamutuk 24.
Jornalista : Osória Marques
Editora : Julia Chatarina
