Ministru Gastão solisita funsionáriu públiku tenke sai servidór Estadu
VIKEKE, 15 Jullu 2025 (TATOLI)—Reprezentante Primeiru-Ministru atuál Ministru Planeamentu Investimentu Estratéjiku (MPIE), Gastão de Sousa husu funsionáriu públika sira tenke sai duni servidór Estadu, la’ós ema mak servisu fali ba funsionáriu sira.
“Iha selebrasaun ne’e ha’u hakarak husu funsionáriu sira tenke servisu sai servidór Estadu duni, la’ós ema mak servisu fali ita. Maibé bá trata dokumentu ruma diretór sira tama servisu la tuir oras, dalaruma tama tuku 9:00. Tan ne’e, ha’u ko’alia hanesan ne’e servidór sira tenke hatene aan ona,”
Gastão hateten iha enserramentu atividade selebrasaun Loron Funsaun Públika, iha kampu futeból, Vikeke Vila, Tersa ne’e.
Notísia relevante: Komemora Loron Nasionál FP, Dom Leandro husu funsionáriu halo reflesaun
Governante ne’e apela ba funsionáriu sira tenke implementa imparsialidade, onestidade iha servisu fatin, liafuan sira-ne’e labele sai slogan de’it, maibé tenke implementa.
“Ha’u espera katak liafuan imparsialidade no onestidade ne’e implementa iha servisu loron-loron nian, labele ko’alia de’it. Ha’u nu’udár reprezentante PM hakarak husu Komisaun Funsaun Públika (KFP) fó toleránsia zero (0) ba hahalok servisu tama tarde no sai sedu,” nia fó-hanoin.
Tan ne’e, Gastão hateten funsionáriu sira-nia dignidade labele sosa ho buat ki’ik ida, tanba funsionáriu públiku nu’udár pilár fundamentál ne’ebé importante ba dezenvolvimentu iha nasaun Timor-Leste.
Iha enserramentu ne’e, partisipa husi membru Governu, Prezidente Komisaun Públika (KPF), Prezidente Komisaun Nasionál Eleisaun (CNE-sigla portugeza), veteranu, funisionáriu husi liña ministeriál, funsionáriu, autoridade lokál no komunidade.
Jornalista: Vitorino Lopez da Costa
Editór: Xisto Freitas da Piedade
