DILI, 16 jullu 2025 (TATOLI) – Ministru Komérsiu no Indústria, Filipus Nino Pereira, simu ona karta konfirmasaun husi nasaun lima sei partisipa Dili International Trade Expo ne’ebé sei realiza entre 28 Augusto to’o 01 Setembru tinan ne’e.
Nia esplika, provizóriu nasaun lima ne’ebé konfirmadu mak hanesan; Malázia, Indonézia, Xina Makau, Brunei, no Kamboja, ida-ne’e dadus provizóriu maibé nasaun balun seidauk konfirma sira-nia prezensa.
“Ida ne’e fó oportunidade di’ak tebes ba ita-nia setór privadu nasionál atu partisipa tanba sei iha mós empreza internasionál sira-ne’ebé partisipa hotu iha expo ne’e rasik,” Nino Pereira ba jornalista sira iha Palásiu Governu, kuarta ne’e.
Ministru afirma preparasaun ba atividade Expo Internasionál Dili ne’e rasik daudaun atinje ona 75%.
“Ita-nia preparasaun ba Dili Expo Internasionál atinje ona 75%, no ita oferese tán oportunidade ba setór privadu no mikro pekena, médiu hodi prepara produtu ne’ebé di’ak, kualidade no sustentabilidade, partisipa iha expo ne’e,” nia relata.
Tuir nia, atividade ne’ebé sei hala’o iha eventu ne’e mak hanesan talk show, matching, negósiu promosaun ba produtu potensiál sira, iha enkontru aprezentasaun oportunidade negósiu nomós investimentu iha Timor-Leste no iha mós asina memorandu entendimentu entre emprezáriu nasionál no internasionál sira.
Iha mós aprezentasaun kona-ba deskobrimentu inovadór ne’ebé husi parte universidade, setór privadu sira ligadu ba iha produtu industriál ka komersiál.
Nia esplika, atu hahú Dili International Trade Expo, Ministériu Komérsiu no Industria (MKI) no Kámara Komérsiu no Indústria Timor-Leste (CCI-TL, iha portugés) halo ona koordenasaun ba iha empreza lokál sira, negósiu ki’ik, setór privadu sira, inklui emprezáriu sira hodi hala’o atividade halibur negósiu ne’e iha munisípiu sira.
“Produtu barak sei aprezenta iha eventu ne’e hanesan produtu komersiál, artezenatu. Ita-nia eventu ida-ne’e sei aprezenta buat barak, espera sei iha partisipasaun másima, liuliu husi setór privadu sira,” nia katak.
Notisía relevante: Empreza 250 sei partisipa iha Dili International Trade Expo
Jornalista: Arminda Fonseca
Editór: Evaristo Soares Martins
