Programa PNDS iha Suku Uma Ki’ik orientadu ba konstrusaun morru protesaun Postu Saúde
VIKEKE, 16 Jullu 2025 (TATOLI)—Programa Nasionál Dezenvolvimentu Suku (PNDS) husi Suku Uma Ki’ik, Postu Administrativu Vikeke Vila, Munisípiu Vikeke, orientadu ba konstrusaun morru protesaun ba Postu Saúde Uma Ki’ik.
“Kona-ba implementasaun programa PNDS ba Suku Uma Ki’ik ba tinan 2025, ami konstrui morru protesaun ba ami-nia Postu Saúde. Tanba ne’e, ami loke ona kuotasaun ne’ebé fornese ona materiál konstrusuan ba morru protesaun nian. Daudaun ne’e ita-nia traballadór sira komesa hada fondasi no harii ai-riin morru nian,” Xefe Suku Uma Ki’ik, Claudino Amaral ba TATOLI iha Suku Uma Ki’ik, Kuarta ne’e.
Autoridade ne’e hatutan konstrusaun obra morru protesaun ba Postu Saúde Uma Ki’ik sei gasta orsamentu hamutuk $23.396,00.
“Obra konstrusaun morru protesaun Postu Saúde ne’e ha’u sei akompaña prosesu servisu atu aselera servisu. Se lae prejudika orsamentu ba obra PNDS. Ezekusaun tarde liu to’o 31 Dezembru. Tan ne’e, ha’u fó atensaun másima ba obra referida,” nia hato’o
Claudino haktuir obra ne’e benifisia ba komunidade Suku Uma Ki’ik inklui komunidade Suku Uma Ua’in Kraik. Tuir dadus, populasaun Suku Uma Ki’ik hamutuk 3.409.
Jornalista: Vitorino Lopez da Costa
Editór: Xisto Freitas da Piedade
