DILI, 16 Jullu 2025 (TATOLI) – Reprezentante Povu iha Uma Fukun Parlamentu Nasionál, levanta kestaun professor husi bolsa kandidatu ne’ebé koloka ba munisípiu sira hasoru problema tanba la simu saláriu liu fulan tolu ona.
Deputada husi bankada FRETILIN, Helena Martins, levanta preokupasaun husi profesór sira-ne’ebé Ministériu Edukasaun (ME) rekruta pasa liuhusi bolsa kandidatu no koloka ona ba munisípiu sira daudaun la simu sira-nia saláriu fulan tolu ona.
“Iha profesór ne’ebé liu bolsa kandidatu, kuaze iha territóriu laran fulan tolu ona, seidauk hetan sira-nia saláriu, sira iha tranferénsia husi munisípiu ida ba munisípiu seluk, aluga fatin mak hela, sosa hahán, entaun difísil tebes,” nia levanta liuhusi reuniaun plenária Parlamentu Komisaun Permanente ba loron dahuluk, iha sala plenária, ohin.
Deputada bankada opozisaun ne’e husu ministériu kompetente atu tau atensaun ho urjénsia.
Deputadu Bankada PD, Armando Lopes, levanta mós kestaun hanesan, tanba manorin na’in ne’ebé ministériu koloka iha fulan-abríl liubá, agora atu tama ba fulan haat ona seidauk simu sira-nia direitu.
“Hanesan iha munisípiu Laútem, purvolta iha profesor na’in-36, ne’ebé koloka iha-ne’eba, foin daudaun sira hasosu ha’u, sira husu ba Ministériu Edukasaun atu haree,” Prezidente Komisaun G iha Parlamentu ne’ebé trata asuntu Edukasaun, Juventude, Desportu, Kultura no Sidadania ne’e hato’o.
Reprezentante Governu liuhusi Vise-Ministru ba asuntu Parlamentár, Adérito Hugo da Costa, rejista preokupasaun referida no sei enkamiña ba ministériu tutela hodi tau atensaun.
Jornalista: Nelson de Sousa
Editór: Evaristo Soares Martins
