Aban, vasina antí Raiva vial 200 husi Austrália to’o iha TL
DILI, 17 Jullu 2025 (TATOLI)—Diretora Ezekutiva Institutu Nasionál Farmásia Produtu Médikamentu (INFPM), Paulina Mendonça, informa aban vasina antí Raiva husi Austrália hamutuk vial 200 sei to’o iha Timor-Leste.
Notísia Relevante: Parlamentu alerta ba falta vasina kontra raiva iha HNGV
“Vasina anti raiva ita sosa ho emrjénsia liuhusi parseiru DFTA hodi sosa iha Autrália ne’e, aban to’o ona ita-nia ra’in hamutuk vial 200, tanba husi programa sira hato’o mai ita ne’e vial 25.500 mak ita presiza atu responde ba ita-nia kazu sira-ne’ebé mak iha. Maibé, aban, estoke balun mai uluk atu hein ba ita-nia prosesu normál ne’ebé mak ita atu hola tan,” Paulina Mendonça hateten ba jornalista sira iha nia kna’ar fatin, Kampung Alor, ohin.
Nia esplika, vasina anti raiva ne’ebé mak sei to’o mai mak INFPM sei responde ba kazu sira-ne’ebé mak iha.
“Ita-nia vasina anti raiva ne’e ita distribui bazeia ba kazu. Se kazu mosu iha área fronteira, ami distribui ba ne’eba, tanba vasina anti raiva ne’e ami hola uluk emerjénsia. Ita hotu hatene katak moras ne’e barak iha mundu, ho nune’e ita hola ho emerjénsia para halo prevensaun ba moras ida-ne’e,” nia haktuir.
Nia relata, moras raiva ne’e nia natureza atu hanesan mós surtu COVID-19, ho nune’e sira hola ai-moruk emerjénsia atu nune’e bele halo prevensaun ba ema sira-ne’ebe asu tata.
Entertantu, Institutu Nasionál Farmásia Produtu Médiku (INFPM), aloka orsamentu hamutuk rihun $300 hodi sosa virus antí Raiva iha Austrália.
Jornalista : Felicidade Ximenes
Editór : Cancio Ximenes
